ماجد الكدواني: أنا وكريم عبد العزيز مصروفين لبعض.. وهو تركيبة إلهية
تحدث الفنان ماجد الكدواني، عن سر الكيمياء بينه وبين صديقه المقرب الفنان كريم عبد العزيز، بجانب حديثه عن أولى تجاربه الكوميدية فيلم حرامية في كي جي 2، والذي تعرف من خلاله على كريم عبد العزيز.
وقال ماجد الكدواني، خلال لقائه مع الفنانة إسعاد يونس، في برنامجها صاحبة السعادة، المذاع عبر شاشة قناة DMC: كريم عبد العزيز برج الأسد، وبرج الأسد قيادي وبينسى نفسه علشان يحل مشاكل الآخرين، وبيستمتع بتحمل المسؤوليات، وأنا برج القوس، والقوس هلهلي عيل وعايز يرمي على حد ومن هنا في كيمياء عجيبة بيني وبين كريم عبد العزيز من يوم ما اتقابلنا.
وتابع ماجد الكدواني: كريم عبد العزيز دايمًا يقول إحنا مش أصحاب ولا إخوات، إحنا مصروفين لبعض، ومن يوم ما اتقابلنا أنا حاسس إني مرمي في حضن حد حنين وأمين وبيخاف عليا، وحساس أوي في مشاعره وحساس اتجاهي أوي، فبقيت بعشقه، وبنتي وهي صغيرة كانت بتقولي هتجوز كريم عبد العزيز، وهو تركيبة إلهية.
أما عن أولى تجاربه الكوميدية، فعلق ماجد الكدواني قائلًا: أنا كنت مرعوب من الكوميدي، أنا جبان في الكوميديا جدًا، وخايف من الإفيهات المباشرة وعايز استخبى في موقف، ولاقيت كريم عبد العزيز قالي أنا حاسس بيك وأنا زيك بخاف من المباشرة، تعالى نستخبى في الشخصية ونصدقها، ولو ضحكنا تمام، لو مضحكنها أدينا متصدقين.
وأضاف: وبدأنا نمشي في هذا المنهج اللي بقى منهجنا في الحياة، وكريم دايمًا يترعب من فكرة أنه يقول إفيه وميضحكش، ودايمًا كان بيحتويني، وأنا برتاح وأنا جنبه.
