جلال العشري: أدوار الشيوخ اللي بعملها بتتعرض لنقد لاذع.. والفن مش حرام
عبّر الفنان جلال العشري عن رأيه في الانتقادات التي وجهت إليه، بسبب دوره في مسلسل حضرة العمدة بطولة الفنانة روبي، الذي شارك في موسم دراما رمضان 2023.
وقال جلال العشري خلال تصريحات خاصة لـ القاهرة 24: أي دور بعمل فيه شيخ بيبقى فيه انتقادات، بس اللي بيعمل الكلام ده هو مش فاهم، أنت اللي بتشوه الدين وحضرتي طالع أقولك إن حضرتك بتشوه الدين، بتشوهه بالشكل اللي أنا هقدمه.
وتابع جلال العشري: علشان أنت شبه اللي أنا بعمله فأنت تاجر، بتتاجر بالدين أنت واحد بيستخبى ورا ستارة الدين، طلع الدين من الموضوع، الدين مش كده الدين سماح دينا دين عظيم، وربنا سبحانه وتعالى قال لسيدنا النبي إنك لعلى خلق عظيم، فازاي يبقى سيدنا النبي بهذه الصفات العظيمة، وأنا أعمل عكسها في الشارع واقتل وأحرق، ده مش ديني أنا برئ من هذا الدين، هذا ليس ديني.
وأكد جلال العشري أنه راض تمامًا عن مسيرته الفنية، مضيفًا: راضي باللي ربنا بيبعته، مانا لو ليا حق أكتر من كده ما ربنا هيبعته فأنا شايف إن مُحصلتي في العطاء كويسة، فـ مش مستعجل لكن الحمد لله راضي وواخد حقي تالت ومتلت سواء عملت أو معملتش، النجاح الحقيقي هو الجمهور، وأنا شايفه في الشارع وطالما أنا وصلت للشارع، يبقى أنا تمام وعامل حاجة كويسة.
جلال العشري عن حرمانية الفن: هو احنا بنعمل أفلام إباحية؟
أما عن رأيه في حرمانية الفن أردف جلال العشري: إيه اللي حرم الفن؟ ليه إحنا بنعمل أفلام إباحية؟ إحنا بنقدم رسالة، الفن جمال والله جميل يحب الجمال، أنا بقول للي عايز يشوفه حرام رسالتك مش صح أنت اللي غاوي تتفرج على الحاجات اللي هي بترجع الأخلاق، لا الفن عظيم والفن رسالة والفن لما بيتعمل بيتعمل علشان ينهض بالمجتمع مش علشان يوقع مجتمع، والشيخ الشعراوي لما سألوه عن الفن قال الكوباية تقدر تحط فيها مياه وتقدر تحط فيها خمرة، إنما هي اسمها كوباية على حسب الدور اللي بتعمله.
