حسام داغر: سعيد بتكريمي في مهرجان المسرح العربي بالإسكندرية.. والناس بتحبني في الكوميدي أكتر
علق الفنان حسام داغر، على تكريمه في مهرجان المسرح العربي بدورته الرابعة بالإسكندرية، المقام حفل افتتاحه اليوم بمكتبة الإسكندرية.
وأعرب حسام داغر عن سعادته بذلك التكريم، وقال: أنا سعيد إني بتكرم النهاردة في مهرجان المسرح العربي في الدورة الرابعة، وشايف إن المهرجان جميل وكل القائمين عليه عاملين مجهود كبير، وكمان لأول مرة أسمع إنهم هيدخله فيه عروض غير متخصصة.
وأضاف داغر: يعني عروض لناس مش دارسين للمسرح، ودي فرصة كويسة للشباب السكندري إنه يلاقي فرصة إنه يتشاف ويتقدر ويتقيم من دكاترة كبار في المعهد العالي للفنون المسرحية، فأنا سعيد جدا بالتكريم وسعيد بالمهرجان وإن شاء الله يبقى دائم ويستمر.
وعن تفاصيل أعماله المقبلة، قال حسام داخر: بحضر مسلسل لرمضان، وعندي فيلم خلصت تصويره مع بيومي فؤاد، وعمرو عبد الجليل ومي كساب، هينزل في شهر 10 إن شاء الله، واسمه الخميس الجاي.
وتطرق حسام داغر، للحديث عن دراسته للتثميل، قائلا: أنا اخترت اللي أنا بحبه وهو إني اتخصص في التمثيل، مش مجرد ممثل، بس كمان بدرّس مادة المسرح والدراما لطلبة كلية الإعلام، وبدرّس التمثيل بشكل عام بقالي 13 سنة، طالما الواحد بيعمل الحاجة الي بيحبها هيعيش مبسوط.
حسام داغر: الناس بتحبني في الكوميدي أكتر
كما كشف حسام داغر، سبب قلة أعماله الفنية، وأشار إلى إنه ممثل كوميدي وتراجيدي، وليس كوميدي فقط، قائلا: الناس بتسأني ليه أعمالك قليلة، ده عشان أنا بختار اللي أنا عايز أعمله بس، والناس بتحبني أكتر في الكوميدي وفكراني بيه، برغم إني عملت تراجيدي كتير زي ابن حلال ودوري في مسلسل زلزال، لدرجة إن الناس بدأت تقولي كفاية تراجيدي وارجع للكوميدي.
