جلال العشري: راضي عن مشواري الفني.. ولو ليا حق أكتر ربنا هيبعته
قال الفنان جلال العشري إنه راضٍ تمامًَا عن مشواره الفني، موضحًا إنه يتأنى في اختيار أعماله الفنية، وأن النجاح الحقيقي بالنسبة له هو حب الجمهور.
وقال جلال العشري في لقائه مع القاهرة 24: أنا راضي باللي ربنا بيبعته، ما أنا لو ليا حق أكتر من كده ما ربنا هيبعته، فأنا شايف إن مُحصلتي في العطاء كويسة، فـ مش مستعجل لكن الحمد لله راضي وواخد حقي تالت ومتلت سواء عملت أو معملتش.
وأضاف جلال العشري: النجاح الحقيقي هو الجمهور، وأنا شايفه في الشارع، وطالما أنا وصلت للشارع يبقى أنا تمام وعامل حاجة كويسة.
جلال العشري عن حرمانية الفن: إحنا بنقدم رسالة
كما كشف الفنان جلال العشري رأيه في حرمانية الفن، قائلًا: إيه اللي حرم الفن؟، ليه إحنا بنعمل أفلام إباحية؟، إحنا بنقدم رسالة، الفن جمال والله جميل يحب الجمال.
أعمال جلال العشري
وتألق الفنان جلال العشري خلال مشاركته في مسلسل بطلوع الروح، الذي عُرض في الموسم الرمضاني 2022 وحقق نجاحًا باهرًا منذ عرض أولى حلقاته.
وشارك في مسلسل بطلوع الروح العديد من الفنانين منهم الفنانة منة شلبي، أحمد صلاح السعدني، إلهام شاهين، محمد حاتم، أيمن عزب، جلال العشري، محمود فارس، والمسلسل من تأليف محمد هشام عبية، وتحت قيادة المخرج كاملة أبو ذكري.
