مش بياكل ولا بيتحرك.. زوجة الفنان أشرف مصيلحي تكشف تطورات حالته الصحية
كشفت المخرجة منال الصيفي، تفاصيل الحالة الصحية لزوجها الفنان أشرف مصيلحي، بعدما نُقل مساء أمس السبت إلى المستشفى.
وقالت منال الصيفي في تصريح خاص لـ القاهرة 24: إحنا روحنا المستشفى امبارح علشان نغير الأجهزة اللي متركبة في جسمه، لأن في منهم اللي بيتغير في البيت وفي اللي لازم يتغير في المستشفى.
وتابعت: وضعه الصحي ثابت هو مش في وعيه ولا في غيبوبة، هو بينام ويفتح عينيه ولكن مبيتكلمش ولا بيتحرك ولا بياكل ولا بيشرب، وإحنا بقالنا كده 3 سنين، ونوع سرطان المخ اللي عنده من النوع الشرس مفيش ليه علاج.
وأكدت المخرجة منال الصيفي، أن هناك فريق طبي كامل من أطباء وممرضين، دائمين التواجد مع زوجها للعناية بحالته الصحية، والحد من تدهورها، مُعلقة: عاملة عناية مركزة في البيت وعنده الدكاترة والممرضين بتوعه موجودين معاه على طول، ومقيمين معاه في البيت.
منال الصيفي: لم أجد سيارة إسعاف مكيفة لنقل زوجي للمستشفى
وفي وقت سابق، قالت المخرجة منال الصيفي، إنها لم تستطيع توفير سيارة إسعاف مكيفة لنقل زوجها الفنان أشرف مصيلحي إلى المستشفى، حيث كتبت عبر حسابها الشخصي بموقع فيسبوك: هل يصح أن الإسعاف الخاص بمنطقة المقطم دون تكييف؟ واحنا بنطلب عربية إسعاف مجهزة تنقل حالة حرجة المستشفى وترجعها ينفع يقولوا مفيش عربية إسعاف بتكييف، لا حول ولا قوة إلا بالله.
وعادت منال الصيفي وطمأنت الجمهور بإيجادها سيارة إسعاف مكيفة لنقل الفنان أشرف مصيلحي إلى المستشفى، قائلة: الحمد لله الإسعاف لقوا سيارة مكيفة.
