والد لاعب المصارعة الهارب سيف شكري: اتفاجئنا بهروبه زي كل الناس.. ومكنش قادر يشيل مصاريفه
روى والد سيف شكري بطل المصارعة الهارب قصة معرفته بسفر ابنه، قائلا: اتفاجئنا أن سيف اتأخر واتصلنا عشان نعرف إيه اللي حصل، طبعا هو راجع من السفر ونزل ترانزيت في دبي واختفى.
وأضاف خلال مداخلة مع برنامج مصر جديدة تقديم الإعلامية إنجي أنور والذي يرأس تحريره الكاتب الصحفي فتحي سليمان: سيف اتصل بيا وطلب مني ألا أقلق عليه، ولم يخبرني أي تفاصيل أخرى، لافتا إلى أن سيف الآن في هولندا، ومش بيتكلم في تفاصيل وكلامه قليل ومطلعش اللي في قلبه.
وأردف قائلا: سيف يشعر بالمظلومية من فترة، هو حساس جدا ومتربي على أنه يعتمد على نفسه لكن شعوره أن عنده 22 سنة يعني راجل ولسه مش عارف يشيل نفسه، ولسه والده بيصرف عليه وطبعا مصاريف كبيرة لأن أي لعبه فردية بتكلف جدا خاصة المصارعة من تغذية وملابس وأحذية خاصة ومكملات وغيرها.
أوضح أن “سيف قبل سفره كان بيحاول يعتذر عن أنه محمل عليا ويقولي أنا عارف أني المفروض أشيل نفسي، وأنا كنت بخفف عنه وأقوله لكل مجتهد نصيب وربنا هيعوضك وانت بتتعب كتير جدا”، لافتا إلى أن سيف يعشق المصارعة ومن عمره 5 سنوات عايش في النادي تمارين طول الوقت.
وواصل حديثه: أوجه رسالة لكل مسئول أو من في يده القرار الاهتمام بالشباب والرياضات الفردية، عندنا شباب زي الورد حرام نموت موهبتهم.
وأوضح أن سيف بالرغم من كونه بطل الجمهورية تحت 17 سنة لم يشارك في أي بطولة دولية وكان المفروض يشارك في كذا بطولة، وهو أحسن لاعب في مصر، وبالفعل صدر قرار وزير أنه يمثل مصر عالميا إلا أنه لم ينفذ القرار مما أثر عليه.
