أحمد كمال: شغلانة الفن صعبة عشان بنصور في عواصف ورياح.. ومش مستني شخصية معينة أقدمها
كشف الفنان أحمد كمال، معايير اختياره لأدواره، بجانب الحديث عن صعوبات مهنة الفن.
وقال أحمد كمال في تصريح خاص لموقع القاهرة 24: مش مستني شخصية معينة عشان أعملها، أنا منتظر أي عمل فني جيد مكتوب بشكل جيد، وبحب الشخصية المعتنى بيها دراميًا ومحاولة الكاتب في الغوص بالشخصية وتاريخها وأحداثها وطموحها.
وأضاف: لو الكاتب قدر يغوص في الشخصية دا بيشدني ونمرة واحد بالنسبالي بتبقى الشركة المنتجة للعمل، لكن الشركات المجهولة في الغالب أنا مبشتغلش معاها، وبهتم بالشركات اللي ليها تاريخ وبتحترم الفنان، ولو جالي شغل من شركة بحترمها ببدأ أقرأ وأشوف السيناريو، ولو عجبني اللي مكتوب والشخصية وكمان لو المخرج متوافق مع أفكاري ده اللى بيحكمني للعمل.
وعن صعوبة مهنة الفن، أوضح أحمد كمال: شغلانة الفن صعبة علشان بنشتغل في ظروف طقسية صعبة زي العواصف والرياح وبنروح أماكن صعبة جدًا، وظروف الشغل في المسرح بتكون مختلفة أكثر عن الدراما والسينما في الترحال والمناطق المختلفة، فالشعلانة صعبة أوي علشان كده الشركات اللي معندهاش تنظيم مبثقش فيها.
تكريم أحمد كمال
وكُرم الفنان أحمد كمال كعضو لجنة تحكيم من المسرح التجريبي مؤخرًا، في حفل ختام الدورة الثلاثين، الذي أقيم على المسرح الكبير بدار الأوبرا المصرية، بحضور كل من الدكتورة نيفين الكيلاني وزيرة الثقافة، والدكتور سامح مهران، رئيس المهرجان، وعدد كبير من الفنانين المصريين والعرب والأجانب.
