تمهيدا لوضع آليات التصويت.. فايزة هنداوي تكشف كواليس اجتماع لجنة اختيار الفيلم المصري المرشح لجائزة الأوسكار
انعقد، أمس، الاجتماع الأول للجنة اختيار الفيلم المصري المرشح للمنافسة على جائزة أوسكار أفضل فيلم دولي، بحضور مجموعة كبيرة من النقاد وصناع الفن، أبرزهم الناقد أحمد شوقي، السيناريست أيمن سلامة، السيناريست مريم نعوم، الناقد أحمد سعد الدين، والناقدة فايزة هنداوي، وغيرهم.
وتواصل القاهرة 24 مع الناقدة فايزة هنداوي، لمعرفة كواليس هذا الاجتماع، والقرارات التي وضعتها اللجنة به، وقالت: لسة مفيش قرارات بخصوص اختيار الفيلم المرشح، إحنا بس اتكلمنا في الاجتماع على إن الناس اللي مشافتش كل الأفلام تكمل مشاهدتهم، فده كان اجتماع تمهيدي بنضع آلية العمل والتصويت في اللجنة.
وأضافت هنداوي: وعملنا قائمة بالأفلام عشان اللي مشافش حاجة يشوفها قبل الاجتماع التاني، بما فيهم فيلم فوي فوي فوي اللي هيتعرض النهاردة، وبعد كدة في اجتماع تاني هنختار فيه، ولسة محددناش معاده، وكل سنة بنعمل كدة إننا نروح نتفرج على كل الأفلام المصرية اللي اتعرضت في السينمات خلال السنة، ونبتدي نختار الفيلم، هو فيلم واحد اللي بيتم ترشيحه.
فايزة هنداوي تكشف معايير اختيار الفيلم المصري المرشح للأوسكار
وأضافت فايزة هنداوي، كاشفةً معايير اختيار الفيلم المصري المرشح لجائزة الأوسكار: معايير الاختيار زي أي معايير إنه يكون كل عناصر الفيلم كويسة من أول الفكرة والسيناريو والتصوير والإخراج، المعايير العادية للفيلم الكويس، وهي معايير موضوعية ملهاش علاقة بمين اللي بيكتب ولا اللي بيخرج.
وأردفت هنداوي: عشان كدة في قرار إنه ممنوع حد يدخل اللجنة وهو له قريب درجة أولى أو تانية أو تالتة عامل فيلم من ضمن أفلام القائمة، حتى لو الشخص هيقصد الموضوعية لكن غصب عنه ممكن ينحاز لفيلم قرايبه لا إراديًا.
واختتمت فايزة هنداوي حديثها قائلةً: أنا بشكل شخصي في فيلم معين في دماغي لحد دلوقتي عاجبني بس عشان المصداقية والموضوعية لازم أتفرج على باقي الأفلام وأقرر.
