أكرم حسني: ظابط الشرطة وظيفة مش شبهي.. ووالدتي كانت أقرب ليا من والدي
تحدث الفنان أكرم حسني عن أولاده وتأثيره بهم، وعن مقياس النجاح بالنسبة له، وعن طفولته مع والده ووالدته، ودخوله مجال الفن والتمثيل بعد تركه العمل بالشرطة.
وقال أكرم حسني خلال لقائه في تصريحات تلفزيونية: النجاح بالنسبة لي أحلى فترات حياتي وبالنسبة لي أنك تعمل حاجه بتحبها وتلاقي ردود أفعال زي ما بتتمنى.. والفن فهي شقين الشق الأول أنك مستمتع وأنت بتعمل ده والشق التاني هو أن ده شغلك اللي بيأكلك عيش.
وأضاف أكرم حسني: أنا سايب كارير مختلف عشان بحب الفن من وأنا صغير وعايز أبقى حاجه في الفن.. ومجموعي مجبليش أني أدخل فنون جميلة أو معهد فنون مسرحية.
وعن أولاده ومدى حبه لهم، أوضح أكرم: أنا أب لولد وبنت، وعلاقتي بأولادي بتمثل لي شيء كبير، والجيل بتاع أولادنا بيفكر غيرنا، وبحاول اتبسط في الدنيا وأحب أني أؤثر في الناس بشكل لطيف.
وعن طفولته ومعاملته مع والده ووالدته، علق أكرم حسني: أصعب اللحظات اللي بتعدي على بني آدم وهو مريض وبقلق شويه منها، وطفولتي كانت هادية وفيها أحلام كتيرة، وكان عندي تمرد مكنتش صانع للمشاكل ولا بحب الزعل.
أكرم حسني: ظابط الشرطة وظيفة مش شبهي.. ووالدي ارتاح من العذاب اللي كان بيشوفه
وعن تركه لوظيفة ظابط الشرطة، قال أكرم حسني: ظابط الشرطة وظيفة مهمة بس مكنتش شبهي، وأبويا كان شايف وظيفة ظابط الشرطة المجتمع بيحترمها، بس بالنسبة لي أنا كنت عايز أروح ناحية الفن.
واختتم أكرم حسني حديثه: بحب صناعة الأغاني.. وجت فترة من الفترات حبيت أدرس وجبت مدرس من كلية تربية موسيقية قولتله أنا مش عايز أدرس المنهج عايزك تحببني في المزيكا أكتر.. قولتله مش عايز اتعلم منهج، ووالدتي كانت أقرب ليا من والدي، والمرض اللي كان عند أبويا مكنش بيخليه يتحرك.. وهو ارتاح من العذاب اللي كان بيشوفه وربنا نزل عليا سكينة، وكملت مسرحية بعد وفاته كنت بعملها.
