أعمل إيه مع جوزي اللي بيضربني ومضيع فلوسه على الستات؟.. أزهري يجيب
أجاب الشيخ أحمد الصباغ، أحد العلماء بـ الأزهر الشريف عن سؤال نصه: جوزي من أول سنة جواز كان بيجيب عشيقته وبينزلها من الشباك، واتجوز عليا وضربني علقة محترمة وأنا تعبت وفلوسه كلها ضايعة على الستات، أتعامل مع الإنسان ده ازاي؟
وقال الصباغ خلال تصريحات تلفزيونية: الست دي بنت أصول ومتربية، وجاية على نفسها عشان خاطر ولادها، ولكن هي غلطانة في الاستمرارية دي كلها مع راجل زي ده، لأنها غفرت مرة، واتنين، وثلاثة، لكن أنا برد على كلمتها أنها بتقول أنا راجعة عشان ولادي فبقولها كتر ألف خيرك، والمريض اللي زي ده صعب جدًا يتظبط.
الصباغ: لو حصل انفصال ستبقى التهلكة أصعب
وتابع الصباغ: ودلوقتي تقولي أعمل أي يا فضيلة الشيخ، فليس بحرام أن تطلب الطلاق، وفي نفس الوقت لو عاوزه تتحملي وتستمري عشان ولادك فأنت مخيرة، ويكون كتر خيرك، لو عاوزه تضحي عشان خاطر ولادك، وبنتك ويجيلها عريس عشان تجوزيها، يبقى كتر ألف خيرك وإن كان دا صعب على أي ست في الدنيا، طب لو مش قادرة تتحملي وهتطلقي منه فخلاص يبقى ده حقك الشرعي.
واختتم: ولو حصل انفصال ستبقى التهلكة أصعب فمن سينفق عليها، وعلى أولادها؟ لأن السيدة خولة المجادلة عندما جاءت للنبي وقالت له أنا لي أولاد إن ضممتهم إليه ضاعوا، وإن ضممتهم ألي جاعوا، فالضحية هنا الأولاد، فالسائلة بتقول أنا مستحملة عشان خاطر أولادي فكتر خيرها، ولكن الإسلام والدين أعطيا لها حق الطلاق وهذا ليس بحرام.
