زينة عن فيلم الإسكندراني: متطمنة مع خالد يوسف.. ومعظم أفلامي تجارية والست المصرية مكافحة
تحدثت الفنانة زينة عن مشاركتها في فيلم الإسكندراني، المأخوذ عن رواية الراحل أسامة أنور عكاشة، والذي يتولى إخراجه خالد يوسف.
وقالت زينة خلال لقائها مع القاهرة 24، عن تعاونها مع المخرج خالد يوسف في فيلم الإسكندراني: أنا متطمنة طول ما أنا بعمل عمل مهم ومع مخرج قادر يحافظ على مكانتي وشغلي ويحافظ عليا كبني آدمة، لأني اتعلمت اشتغل مع مخرجين يبقوا مقدرين قيمة الفنان اللي قدامهم ويكونوا عادلين.
كما علقت زينة على تعاونها للمرة الأولى مع الفنان أحمد العوضي، قائلة: لسه أول مرة أتعاون مع أحمد العوضي، ومبسوطة بتعاوني مع كل الممثلين اللي في الفيلم، وأستاذ حسين فهمي بموت فيه وبحبه جدًا واشتغلت معاه وأنا صغيرة عندي 17 سنة، فأنا بحس أن عندي تاريخ لأني اشتغلت مع فنانين كبيرة ومحترمين.
زينة: الست المصرية مكافحة.. ومعظم أفلامي تجارية
وعن تفاصيل شخصيتها في فيلم الإسكندراني، فقالت زينة: هقدم شخصية مختلفة، وأنا بعمل شخصية قمر هي بنت إسكندرانية جدعة وبتعيش حياة ظالمة بس بتكافح وبتعيش زي أي ست مصرية، وأنا بحس أن الستات دايمًا مكافحين في الحياة والست الكويسة تعيش على قد اللي معاها.
وأضافت: الشخصية هيكون فيها ظلم مشاعر وكذب، وأي عمل بيبقى مسؤولية حتى لو حاجات أنا ساعات ببقى مترددة جدًا إني أعملها، والله ببقى متقنة فيها أكتر من حاجات تانية.
وتابعت: الوجع الرومانسي للشخصيات الدرامية تمثيله أحلى، وأهم حاجة أن بطلة الفيلم متستهونش بأي مشهد، لما أعمل فيلم كبير لازم أبقى حقيقية وأقدم رسالة.
وأكدت الفنانة زينة أن معظم الأفلام التي قدمتها خلال مشوارها الفني، كانت تجارية.
