لاقيت لحن أغنية بنت أبويا بعد 4 سنين وعادل إمام غير مساري المهني.. أبرز تصريحات منة عدلي القيعي مع معتز الدمرداش
حلت الشاعرة منة عدلي القيعي، ضيفة على الإعلامي معتز الدمرداش، في برنامجه ضيفي، وتحدثت خلال اللقاء عن تفاصيل مشوارها الفني، وتفاصيل مكالمة الزعيم عادل إمام لها والتي غيرت مسارها المهني.
ونستعرض لكم أبرز تصريحات منة عدلي القيعي مع معتز الدمرداش:
- أسرتي 4 أفراد وكلنا بنكتب، ووالدي أكتر واحد تمرس في الكتابة وعمل مجلات وخواطر، وأنا لما احترفت الكتابة بابا وماما بيطلعوا معايا الموضوع وبيصلحوا معايا الكلمات والأوزان.
- عمر أهلي ما وقفوا في طريقي ولكن القلق وقف في الطريق، أنا داخلة شغلانة نوعيتها صعبة والبنات مش كتير فيها.
- أغنية اختياراتي مدمرة حياتي مش أغنية شخصية، ولكن هي بتعبر عن كل الناس لما بيهزروا على نفسهم، وأنا حسيت أن ده إفيه ممكن يبقى دمه خفيف والناس دايمًا بتقوله على نفسها.
- أنا مش بخترع حاجة أنا بشوف إيه الحاجة المشتركة بين الناس أو إيه الحاجة اللي بيهزروا بيها بس محدش بيقولها، ودايمًا الأغاني بتيجي من هنا.
- اتعرفنا على بعض أنا وحسن الشافعي بالصدفة وعرفني أكتب إزاي أغنية الإعلان لغاية ما وصلنا لـ أغنية 6 وشوش، وأنا مكنتش فاهمة أوي اللي بيحصل لاقيت الأغنية بتنجح ومكنتش متعودة غير على الإعلانات، ومكنتش مصدقة.
- كنت قاعدة يوم في البيت ولاقيت رقم برايفيت بيتصل بيا، قالي أيوه يا منة أنا عادل إمام قومت من مكاني وقعدت أقول يا لهوي وهو ضحك وقالي أنا بسمع أغنية 6 وشوش وحافظها ومتخيلتش أن بنت اللي كتباها وفي سنك، إنتي عارفة أن والدك صاحبي وكلم والدي وقاله لازم تشجعها.
- عادل إمام قالي إنتي بتشتغلي إيه؟ سيبي اللي إنتي بتعمليه وركزي في الأغاني واللون ده، ومتشتتيش نفسك وألحقيها من بدري، وأنا طبقت نصيحته.
- أنا من زمان نفسي أعمل أغنية رومانسية عن الأب، لأن علاقة البنت بـ أبوها دايمًا فيها شيء من الرومانسية، قعدت كتير جدًا ويمكن سنين مش عارفة أكتب، عارفة إني عايزة أكتب أغنية اسمها بنت أبويا، وطلعت بـ كوبليه بيقولولي إني شبهك لأن الناس بتقولي إن شبه بابا.
- بابا كان راجع من البرنامج وفي صوت تكة للمفتاح في الباب فأنا عرفت أن بابا جه، في ثانية جالي الكلام وقررت إني هحكي في أغنية بنت أبويا اللحظات اللي بحبها وكتبت باقي الأغنية في 10 دقائق، والناس بتبكي تأثرًا ولو حزن بتكون بسبب فقدان الأب.
- أنا قعدت 3 أو 4 سنين عشان ألاقي اللحن اللي أنا عايزاه لأغنية بنت أبويا، وفضلت معايا سنة مبسمعهاش لبابا عشان أنا عايزاه يسمعها لما تكمل، ومنتج مسلسل موضوع عائلي قالي إنه عايز أغنية عن الأب، وقولت دي أحسن فرصة إني أنفذ بيها الأغنية دي.
