أمين الفتوى: الصلاة تحفظ النعمة وتحمي من غضب الله
أجاب الدكتور علي فخر، أمين الفتوى بدار الإفتاء المصرية، على سؤال ورد إليه من فتاة، مفاده إنها لا تصلي وتكسل عن أداء الصلاة، فماذا تفعل؟.
الصلاة صلة بين العبد وربه
وقال أمين الفتوى بدار الإفتاء المصرية، خلال تصريحات تلفزيونية، اليوم الأحد: أول حاجة لازم تبقى عارفة إن كل الخير اللي هي عايشة فيه والمدرسة وكل نعمة حولها فيها خير وراحة بال، من الله سبحانه وتعالى، ربنا مطلبش مننا غير إننا نصلي عشان يكون في صلة بينا وبين الله.
وأضاف: الخير اللى بيعود من الصلاة هل لله سبحانه وتعالى ولا للعبد؟ يبقى لازم عشان النعمة تزيد يبقى لازم تصلي، لو هجرت الصلاة يبقى أنت قطعت الصلة اللي بينك وبين ربنا، فهل كده يحافظ على النعمة، النعمة ممكن تدوم وأنت مش بتصلي بس ده نعمة من الله، لأن الله صبور، لكن لو استمريت يمكن يحدث غضب من الله.
واستكمل: عشان اتعود على الصلاة يبقى أول حاجة أعملها إنى أسيب الحاجة اللى في إيدي وأصلي، لأن الأذان بيقول (الله أكبر)، يبقى الله أكبر من كل اللى في إيدك، حتى الدنيا كلها، عشان ربنا يرضى عنك وتلاقي الصلاة أًصبحت يسيرة وليست ثقيلة.
