نجيب ساويرس: مستغرب الناس اللي لسة مراحتش الجونة لحد دلوقتي.. دي أجمل مدينة سياحية في مصر
قال المهندس نجيب ساويرس مؤسس مهرجان الجونة، إن منتجع الجونة السياحي الأجمل في مصر.
جاء هذا خلال المؤتمر الصحفي الخاص بمهرجان الجونة السينمائي، للكشف عن خطة المهرجان، المقرر إقامته في الفترة من يوم 13 إلى 20 أكتوبر المقبل.
وقال خلال المؤتمر: أول ما قابلت انتشال التميمي قلتله عايزين نعمل مهرجان سينمائي في مصر، واللي عرّفني عليه كانت بشرى ونتمنى إنها تكون معانا السنة دي، وانتشال حبني في 10 دقايق وقررنا نعمله.
وتابع نجيب ساويرس، متحدثًا عن مهرجان الجونة: المهرجان نجح نجاح ساحق، والناس مكانتش شافت الجونة، أنا مستغرب الناس اللي مراحتش الجونة لحد دلوقتي إزاي مراحوش، دي أجمل مدينة سياحية في مصر.
من جانبه، كان أشار عمرو منسي، المدير التنفيذي لمهرجان الجونة، إلى أن نجيب ساويرس هو السبب وراء عودة المهرجان، بعد توقفه العام الماضي.
وقال خلال المؤتمر: ناس كتير كانت واثقة إن مهرجان الجونة مش هيرجع بعد ما وقف سنة، لكن إصرار المهندس نجيب ساويرس هو اللي رجّع المهرجان، لأنه واثق إنه بيأثر في الصناعة بشكل جيد في مصر.
مهرجان الجونة السينمائي
مهرجان الجونة هو أحد المهرجانات الرائدة في منطقة الشرق الأوسط، يهدف إلى ربط صناع الأفلام من المنطقة العربية بنظرائهم الدوليين تعزيزًا لروح التعاون وتشجيعًا للتبادل الثقافي، ومن المقرر إقامته من يوم 13 إلى يوم 20 أكتوبر المقبل، والذي سيضم عددا من الفعاليات به، وسط مشاركة العديد من الأفلام القصيرة والطويلة.
