هادي الباجوري: هناك خطة للجزء الثاني من سفاح الجيزة.. وسأعتذر عنه في هذه الحالة
تحدث المخرج هادي الباجوري، عن إمكانية وجود جزء ثاني من مسلسل سفاح الجيزة، بطولة الفنان أحمد فهمي، والذي عُرض خلال الفترة الماضية عبر منصة شاهد الإلكترونية وحقق نجاح كبير منذ عرض أولى حلقاته.
وقال هادي الباجوري، خلال لقائه في برنامج تفاعلكم: إحنا لسه مش محددين في جزء ثاني أو ثالث ودي حاجة ليها علاقة بشركة الإنتاج أكتر مني، لأن ممكن يكون في جزء ثاني ومكنش أنا المخرج بتاعه مش لازم كل الأجزاء أكون أنا المخرج بتاعها، ولكن شركة الإنتاج هي اللي بتحدد، واللي أنا عارفه أن في خطة يكون في جزء ثاني.
وأكد المخرج هادي الباجوري، أنه من المحتمل أن يعتذر عن إخراج الجزء الثاني من مسلسل سفاح الجيزة في حال عدم تقديم فكرة جديدة بالعمل، قائلًا: أنا دايمًا لما بحب أعمل حاجة يكون عندي تحدي بعمله، والجزء اللي الناس شافته أنا كمخرج معملتش النوعية جي قبل كده، والجزء الثاني لو اتعرض عليا لو ملقتش فيه الحاجة اللي تخليني أعمل حاجة جديدة ممكن أعتذر.
وتابع: أنا مبتأثرش أوي بآراء السوشيال ميديا سواء كانت بالمدح أو لأ ومش بتابعها أوي، وأنا بقيم العمل من وجهة نظري أنا مبسوط منه ولا لأ أو فيه عيوب وببقى عارف من الأول أن ده اللي أنا راضي بيه، ومفيش عمل مفيش فيه آراء مختلفة ومقدرش أسأل الناس إنتوا كنتوا عايزينه ينتهي إزاي، ودي حاجة موجودة طول الوقت وفكرة أن يكون في آراء مختلفة دي حاجة صحية للعمل، ومستحيل نرضي كل الناس.
وأضاف: ممكن الجزء الأول من الحلقات علشان كان في قتل ودبح ودم، الناس شافوه مختلف عن الجزء الثاني من الحلقات وده اللي إحنا قصدناه ومحدش كان متوقع اللي حصل في الحلقات.
