إياد نصار: السوق رجعني لـ ورا بعد تقديمي شخصية الشهيد محمد مبروك.. وأنا مش ندمان
تحدث الفنان إياد نصار، عن تقديمه شخصية الشهيد محمد مبروك خلال أحداث مسلسل الاختيار2، والذي عُرض في موسم رمضان 2021، موضحًا أنه قرر عدم تقديم أي شخصية أخرى بجانب شخصيته في مسلسل الاختيار في السباق الرمضاني، احترامًا وتقديرًا للشهيد.
وقال إياد نصار، خلال لقائه بـ برنامج ON Set: لما عملت شخصية الشهيد محمد مبروك في مسلسل الاختيار كان أول 10 حلقات بس، وأنا كان بيبقى في دايمًا مسلسل في رمضان أنا موجود فيه من الشخصيات الرئيسية علشان أنا عندي مشكلة مع مصطلح البطولة المطلقة، وكان أول مرة أكون موجود في رمضان 10 حلقات بس.
وتابع: كان معروض عليا أعمل مسلسل تاني معاه، ولكن وأنا بصور الاختيار قولت للمخرج بيتر ميمي أنا مش هصور حاجة تانية، أنا مش هضمن إيه هي الشخصية التانية بتعمل إيه، واحترامًا للشهيد والفكرة وأولاده، قررت إني مش هطلع غير في 10 حلقات في رمضان ومحدش هيشوفني في أي شخصية تانية معاه.
وأضاف إياد نصار: أثر إني اشتغلت 10 حلقات بس في رمضان أن السوق رجعني لـ ورا ومش عارف إزاي، فأصبح إني بتعاقب إني على قد ما حسيت الشخصية واحترامي للشهيد إني مقدمش شخصية تانية في رمضان، ولكني مش ندمان.
إياد نصار: شخصيتي في فيلم الممر من أصعب الشخصيات اللي قدمتها
كما تحدث الفنان إياد نصار، عن دوره في فيلم الممر، قائلًا: الشخصية دي من أصعب الشخصيات اللي عملتها، وأنا لما بشتغل على شخصية بتعاطف معاها وبحاول أفهم موقفها حتى لو أنا مش مؤمن بـ أفكارها، وعلشان أكون حقيقي قدام الناس لازم أكون اتعاطف معاها بشكل معين، إلا الشخصية دي أنا معرفتش إزاي اتعاطف معاها ومش قادر أبرر أفكارها، لغاية ما لاقيت منطقة إني مش هتعاطف مع الشخصية وفي نفس الوقت مصدقها، ودي كانت مرحلة صعبة جدًا في التحضيره وأستاذ شريف عرفة عدل الاسكريبت واشتغلنا على التفاصيل.
