محمد نور: فيه ناس كتير بالوسط الفني مش هشتغل معاهم.. وبجامل علشان اريح دماغي
قال الفنان محمد نور، إن هناك العديد من الأشخاص في الوسط الفني لن يتعاون معهم مرة أخرى، موضحًا أنه لا يلتفت إلا لمستقبله الفني فقط.
وأضاف محمد نور في لقائه مع القاهرة 24: فيه ناس كتير مش هشتغل معاها في الوسط الفني، واللي بتضايق منه مبشتغلش معاه تاني، واللي ممكن تتعاون معاه هو الفنان عبد الباسط حمودة، ممكن نعمل دويتو مع بعض.
وأوضح محمد نور أنه لا يحب الدخول في نقاشات ليس لها أي داع، مؤكدًا أنه يلجأ للمجاملة في الكثير من الأحيان، قائلًا: بجامل وبريح دماغي.
محمد نور: الدراما صعبة ومش بشارك فيها لأني بزهق
وسبق وتحدث محمد نور في لقائه مع القاهرة 24، عن إمكانية مشاركته في الأعمال الدرامية بعدما خاض التجربة السينمائية، قائلًا: الدراما بتبقى صعبة أوي، واتعرض عليا كتير، ولكن أنت ممكن تخرج من بيتك في شهر 11 وترجع في شهر 3. لكن لو اتعرض عليا حاجة حلوة ممكن أوافق، ولكن الدراما صعبة أوي وأنا بزهق بسرعة.
كما علق على تجربته السينمائية الأخيرة، فيلم الحب بتفاصيله، قائلًا: الحمد لله فيلم الحب بتفاصيله نجح وعمل شغل كويس، وهينزل على المنصات الأيام اللي جاية، وأنا عملت فيه 5 أغاني.
وأضاف: فيلم الحب بتفاصيله كان لطيف، وأي حد من الأسرة يقدر يدخله ومكنش فيه أي مشاكل ولا أي حاجة خادشة، وأنا كان نفسي أعمل حاجة ناس صغيرة وكبيرة يقدروا يدخلوها، والحمد لله الفيلم طلع محترم.
