محمود الليثي: مكنتش بحب نفسي وأنا صغير وأمي كانت بتخاف عليا من الحسد.. وهند صبري زي الأخطبوط
كشف الفنان محمود الليثي، قصة بداية تعارفه بزوجته، كما أشار إلى أنه لم يكن يحب نفسه وهو صغير، وكانت والدته تخاف عليه من الحسد.
وقال محمود الليثي خلال تصريحات تليفزيونية: روحت اتقدمت لمراتي من وراها، اللي حصل إني قبل ما أشوف مراتي حلمت بيها وبملامحها بالظبط كانت في اللاوعي عندي، ولما شوفتها سألت صحابي عليها وعرفت إنها مقفلة على نفسها.
وأردف الليثي: فروحت لباباها قولتله أنا بشتغل مهندس بس حاليًا مش شغال مهندس وبمثل، وهي جالها الخبر إن حد اتقدملها وتقريبا أنا صعبت عليها فوافقت، وحاليا علاقتي بمراتي إني باخد رأيها في معظم الحاجات عشان فيه حاجات مينفعش تتحكي للأهل والأصدقاء.
محمود الليثي: أمي كانت بتخاف عليا من الحسد وأنا صغير
وأضاف محمود اللليثي، كاشفًا أنه كان لا يحب نفسه وهو صغير، وقال: وأنا صغير كنت بلبس نضارة وأنا حواجبي تقيلة فتحس إنك مش شايف حاجة من ملامح وشي، وكان عندي مشكلة زمان في شكلي ومكنتش حابب نفسي وده راجع لحاجات كئيبة حصلتلي.
وأردف الليثي: بعدين بقيت بحب نفسي جدا، ومامتي كانت بتخاف عليا أتحسد ولما كان بيجيلنا ناس قرايبنا هي بتخاف منهم كانت بتخليني أدخل الأوضة ومقعدش معاهم عشان خوفها من الحسد.
محمود الليثي: هند صبري زي الأخطبوط
واختتم محمود الليثي حديثه، كاشفًا رأيه في عدد من زملائه من الفنانين، وقال: بشوف إن هند صبري زي الأخطبوط، ممكن تبقى بتكلمك ومركزة مع حد بيعمل الإكسسوار وبتراجع السكريبت وعايزة تعدل عليه وممكن تعمل 15 حاجة مع بعض.
واستكمل محمود الليثي: محمد ممدوح في الحقيقة دمه خفيف فوق العادي وأنا بعتب عليه إنه مقل في الكوميديا، أمينة خليل دايما هادية ومتسمعلهاش حس وحتى لو فيه مشكلة بتروح بعيد وتتكلم براحة، وأكرم حسني مزجانجي أوي في الأكل ومش بياكل أي حاجة، لدرجة ممكن يجيب المشويات من مطعم والطحينة من مطعم تاني عشان دقيق في الموضوع ده.
