لقاء الخميسي: بكلم أبويا بعد وفاته ولما أصيب بالكانسر كلمت ربنا وقلت ليه تعمل فيه كده
تحدثت الفنانة لقاء الخميسي عن طفولتها ووالدتها، مشيرة إلى أنها عاشت طفولة جميلة ولكنها لم تنس ذكرياتها مع والدها وسيظل الرجل الأخير في حياتها.
وقالت لقاء الخميسي في لقاء تلفزيوني: عشت طفولة جميلة وأول حاجة بفتكرها منها هو بابايا، وبموت فيه هو الرجل الأول والأخير وييجي في النص بقى شوية رجالة، هو كان صاحبي وصديقي اللي مش بخبي عنه حاجة، بشوفه راجل مختلف حساس راقي طيب فنان، لما بيتعصب الدنيا بتبقى وحشة، بس ده طبيعي من شخص هادي.
وأضافت لقاء الخميسي: أنا الأخت الكبيرة وبابا مكنش بيزعق لما نغلط كان بيقعد يشرح لنا ويجاوب على أسئلتنا، والعلاقة بينا ملهاش وصف، هو صوتي الداخلي وما زال، بكلمه لحد دلوقتي وبيرد عليا وبقول له الحاجات الحلوة والوحشة، بتحصل علامات فبقول ده رد.
وتابعت لقاء الخميسي: موت والدي كان متمهدلي لأنه توفى بالسرطان والدكاترة كانوا قايلين إن دي النهاية بس مع ذلك كنت في حالة إنكار ومكنتش ببقى عايز أدخل أبص عليه لأني مش هشوف الراجل اللي أنا عارفاه أنا هشوف راجل غير قادر على فعل الأشياء اللي كان متعود عليها، ودي كانت بتجرحني أوي وكنت بكلم ربنا وبتوجع أوي ولما مشي الناس اللي حواليا استغربت من قوتي، لأني مؤمنة إنه هيفضل عايش جوايا.
كنت بزعل وبقول لربنا ليه تعمل فيه كده؟
واستكملت لقاء الخميسي: كنت بزعل وبقول لربنا ليه تعمل فيه كده؟، بعد مامشي كانت مأساة بس كنت قوية جدًا من بره، لكن من جوه ضعيفة جدًا، لأني مؤمنة أنه مماتش، هو طول الوقت موجود، لو عندي مشكلة في حاجة أنا عارفة هو عايزني أعمل إيه.. فعايشة بنصايحه لحد دلوقتي.
