لقاء الخميسي: أخدت من أمي الجنان ومن أبويا الفن.. وأنا والراحلة شيرين الطحان كنا صحاب
تحدثت الفنانة لقاء الخميسي، عن والدتها ووالدها، وكشفت عن الصفات المشتركة بينها وبينهم، كما أشارت إلى إنها كانت تجمعها علاقة قوية بالفنانة الراحلة شيرين الطحان.
وقالت لقاء الخميسي خلال تصريحات تليفزيونية: أنا من أم عراقية ومن أب مصري، فـ أخدت من أمي جنانها، والحركة السريعة والاهتمام وإنها على طول نشيطة وبتعمل كذا حاجة مع بعض، وأخدت من أبويا الفن والأحلام والمزيكا وكل ما له علاقة بمنطقة المشاعر والأحاسيس، وأنا عاطفية وخيالية ورومانسية جدا.
لقاء الخميسي: أنا وشيرين الطحان كنا صحاب
وتابعت لقاء الخميسي: أنا والراحلة شيرين الطحان كنا صحاب، وبعد وفاة بابا بالسرطان، بقيت مقدرش أروح أبدا أزور أي شخص عنده كانسر، بس كنت دايما كنت على تواصل مع والدتها قبل وفاتها وفي فترة مرضها.
وأضافت لقاء الخميسي، مشيرةً إلى إنها عانت في حياتها مع أشخاص كانوا يغيرون منها، قائلةً: في خمس ستات في حياتي واتنين رجالة كانوا صفحة سودا في حياتي، وده بسبب الغيرة مني.
كما كانت تحدثت لقاء الخميسي، عن علاقتها بزوجها اللاعب محمد عبد المنصف، وروت قصة بداية تعارفهما، وقالت: أول ما بصيت لعين عبد المنصف، حسيته حنون وطيب، هو اللي قالي في الأول بحبك، واتقابلنا صدفة في كافيه.
وتابعت الخميسي: بعدها خرجنا ولعبنا تنس، لقيته بريء براءة غير طبيعية، وكنت بقول هو الراجل ده ممسكش إيدي ليه؟، وليه طول الوقت بيبص لي في عيني بس، اليوم اللي مسك فيه إيدي هو اليوم اللي باسني على خدي وقالي فيه تتجوزيني، كان بقاله 6 شهور ممسكش إيدي.. مش عارفة ليه.
