إيهاب فهمي: الفنان بيضحي بفلوسه لما يشتغل مسرح.. واللي مشتغلش فيه قليل الموهبة
تحدث الفنان إيهاب فهمي رئيس المركز القومي للمسرح والموسيقى والفنون الشعبية عن طبيعة عمل الفنان في المسرح، مشيرًا إلى أنه يضحي بالكثير من الأموال في سبيل المشاركة فقط في أعمال تابعة لمسارح الدولة.
وقال إيهاب فهمي خلال لقائه مع القاهرة 24: لما مسكت المسرح القومي بدأت بالكوميدي من نجوم كانوا محتاجين زقة ودي الطريقة اللي بدأت بيها وكنت براهن بيها، والحمد لله إني نجحت في إني أزق نجوم في عدد من المسارح.
وأضاف: شايف إن الفنان لما بتتوفر له سُبل الراحة، مش المقصود بيها الفلوس؛ لأنهم بيضحوا بأموال كثيرة عشان يشتغلوا على عرض في سبيل إنهم يشتغلوا باسم مسرح البلد، وسُبل الراحة اللي أقصدها هي الدعايا وطريقة العرض، وكنت من أصحاب فكرة ليه نعرض كل أسبوع.
وأردف إيهاب فهمي بـ: لما بتتوفر عناصر راحة بيبقى العمل جميل، والمسرح هو أساس كل حاجة، الفنان المسرحي هو الأساس، ودون مسرح بشوف إن الموهبة بتبقى قليلة أوي، وإذا حبيت تشوف ممثل عظيم عليه أنه يكون خريج مسرح أو وقف على مسرح أو غاوي مسرح المسرح هو أبو الفنون.
أعمال إيهاب فهمي
ويعد مسلسل الأصلي بطولة الفنانة ريهام عبد الغفور آخر أعمال إيهاب فهمي، وظهر خلال أحداثه بدور زوج الفنانة منال سلامة شقيقة ريهام عبد الغفور، وعُرض المسلسل قبل موسم دراما رمضان 2023.
