ياسمين صبري: ربنا أنعم عليا بالشكل.. ومبصرفش جنيه العلامات التجارية هما اللي بيصرفوا
تحدثت الفنانة ياسمين صبري، عن عدة موضوعات متنوعة بحياتها، وأشارت إلى أنها تتمتع بنعمة الشكل الجميل وهذه حقيقة لا تُنكر، مؤكدةً أنها لا تنفق كثيرا على مظهرها وأن أغلب الأشياء تتفق عليها العلامات التجارية التي تعمل معهم.
وقالت ياسمين صبري خلال تصريحاتها ببرنامج الحكاية مع الإعلامي عمرو أديب: ربنا أنعم عليا بالشكل ودي حاجة منقدرش ننكرها، فالشكل ساعدني أكون واجهة للعلامات التجارية وأنا كملت ده بالواجهة والأسلوب واللبس، مفيش حاجة كاملة، ولما بيبقى معايا صديقتي وجوزها ييجي أنا بمشي على طول عشان هي تكون مرتاحة لحد ما تُصر إني أقعد معاهم.
ياسمين صبري: مش بصرف جنيه العلامات التجارية هما اللي بيصرفوا
وأردفت ياسمين صبري، معلقة على تعليقات المتابعين على صورها: بشوف كومنتات ناس بتقول هي بتصرف كل الفلوس دي إزاي؟ واللي مش عارفينه إني مش بصرف جنيه.. لما الإنسان بيكون واجهة بتيجي علامات تجارية تقول أنا عايز الست دي تمثلني وتكون السفيرة بتاعتي لأنها بتدي انطباع.. وأنا بعمل دعاية بطريقة غير مباشرة، لإن الإعلانات المباشرة واللي بالغصب وبالعافية كانت زمان والناس هتنفر مني كده.
وأضافت ياسمين صبري:اللي الناس بيشوفوه اه هو حياتي، ومن يومين بقول في الستوري صباح العمل والبركة لقيت الناس بتقولي فين العمل ده انتي بتصوري القهوة بس؟، لأ أنا مش بحب أصدر التعب والحاجة الصعبة مش أكتر، والشغل بيكون صعب التصوير مثلا الإعلان بيتصور في 18 ساعة في اليوم عشان 20 ثانية تطلع.
ياسمين صبري: أنا لا أكون عدائات
واختتمت ياسمين صبري حديثها، قائلة: أنا لا أكوّن عدائات ودرست ده، ومين يزعل من التطور المادي وليه الموضوع ده بيكون حاجة حساسة بالنسبة للناس، والإنسان لازم يعمل قيمة لنفسه مش بس يعتمد على أنا ابن فلان، بالعكس ده ممكن يبقى نقمة والناس هتعاملك عشان ابن فلان بس، والفلوس حلوة أكيد والأحلى إنك تعرف تعملها.
