منال الفطاطري والدة داليا وبسنت شوقي تكشف سبب ابتعادها عن التمثيل وتتحدث عن علاقتها بمحمد فراج
كشفت الفنانة منال الفطاطري، سبب ابتعادها عن التمثيل، مؤكدة إنها ليست نادمة على اختيارها لحياتها الأسرية على حساب مستقبلها الفني، بجانب حديثها عن علاقتها بالفنان محمد فراج، زوج ابنتها الفنانة بسنت شوقي.
وقالت في تصريحات تليفزيونية: أنا تعبت في ولادي أوي، وأنا كنت منفصلة وهما كانوا كل حياتي، وأنا اشتغلت 4 سنين ولكن بالنسبة ليا كأنهم 10 سنين كانوا كورس مكثف يعني والحقيقة إني حققت نجاح ولكن كان عليا ضغوط وأولادي مكنوش مبسوطين، والشغلانة عايزة حد فايق ورايق ومركز أوي وأنا عملت أقصى ما عندي وكان لازم أختار ولادي.
وأضافت: أنا مندمتش ولكن زعلت على 17 سنة عدوا وبناتي اتجوزوا واحدة ورا التانية، ولكن الحمد لله ربنا معوضني وكارمني بيهم، وبقالي 17 سنة بقول لو جالي عمل حلو وظروفي تسمح هرجع للتمثيل، ولغاية دلوقتي ظروفي مسمحتش، وأنا مكنتش بحسب زمان أن البنات هيكبروا ويتجوزوا والحياة هتتغير.
وأكدت منال الفطاطري، أن ابنتها الفنانة بسنت شوقي، تشبهها في الكثير من الطباع، قائلة: بسنت أكتر واحد شايلة مسؤولية في إخواتها، وساعات بحس بفراغ ولكني لسة مشغولة بـ داليا، ومازال بناتي في حياتي ولكن مش زي الأول، وعمري ما حسيت بالفراغ والزهق، أنا عندي 3 بنات وعايشة حيواتهم مش حياتي أنا بس.
منال الفطاطري: محمد فراج مُسالم وبنتي بسنت شوقي متمسكة بحقوقها
أما عن تفاصيل علاقتها بالفنان محمد فراج، زوج ابنتها بسنت شوقي، قائلت: أعمل حمى على محمد فراج إزاي ده شربات، وأنا مينفعش أعمل حمى، أنا بحب أوازن بينه وبين بسنت لأنه حبيبي أوي وهو طيب ومُسالم جدًا وبياخد قلبي، هما الاتنين طيبين بس بسنت الجيل الجديد عارفة حقوقها كويس ومتمسكة بيها، وفراج راجل وابن بلد.
واستكملت: مقلقتش من الشائعات اللي بتطلع عليهم لأننا متعودين عليها، وبقى عندنا شماعة الحسد، محسودين إيه ما فيه حاجات نشتغل عليها، ومش عايزين نستعمل الحسد كشماعة مع إنه مذكور في القرآن، وهما الاتنين ما شاء الله ناضجين أوي ومسؤولياتهم كتير أوي ولكن عارفين ينظموا حياتهم وربنا يعينهم عليها.
أما عن الشخصية التي كانت تتمنى تقديمها، فعلقت منال الفطاطري: كان نفسي أعمل دور فاتن حمام في فيلم نهر الحب، ودلوقتي خلاص مبقاش عندي أصحاب في الوسط الفني، غير الفنانين اللي اشتغلت معاهم زي تيسير فهمي وداليا البحيري ونرمين الفقي، ومكنش عندي وقت أعمل صداقات في الوسط ودي من الحاجات اللي زعلانة عليها.
