أخوكي ميّت تحت.. شقيقة ضحية التنقيب عن الآثار بمنشية ناصر: المتهم أغوى أخويا وابنه اعترف عليه |خاص
لقي شاب يدعى أحمد عبد المنعم، سائق توك توك، في العقد الثالث من العمر مصرعه، أثناء التنقيب عن الآثار داخل منزل أحد الأشخاص، ودفنه المتهمان المشتركان في عملية التنقيب عن الآثار داخل الحفرة، ولم يخبرا أسرته بمصيره.
وفاة شاب أثناء التنقيب عن الآثار
وحصل القاهرة 24 على نص التحقيقات في القضية، واستدعت رجال التحقيق سماح عبد المنعم 37 سنة، وتعمل ربة منزل وهي شقيقة المجني عليه، وقالت: اللي حصل إن أخويا شغال على توك توك، ووالدتي يوم التلات كلمتي وقالتلي أخوكي مرجعش من امبارح، وبعدين فضلت أضغط عليها لحد ما حكتلي على العلاقة اللي بين واحد اسمه رشاد وأحمد أخويا، وإن رشاد ده جالنا البيت وخد أخوكي في شغل وبیروح عنده يحفر وکده، ومفهمتش برضه أوي بيحفروا ليه بس أنا شكيت، وبعدين والدتي راحت البيت تشوف أخويا وملقتش حد وبعدها كلمتي وقالتلي روحت البيت عند رشاد، ومحدش فيهم في البيت، وروحت المكان عندهم وبعدين كلمت مراته اللي اسمها ميرفت وقولتلها أخويا فين قالتلي أخوكي مين قولتتها أحمد عبد المنعم، قالتلي مجاش عندنا ومشوفتوش من زمان وأنا في المنصورة، قولتلها أنا عرفت كل حاجة، بعد ما أمي حكت لي كل حاجة، وقولنالها لو مجیتيش هنبلغ الحكومة وهنوديكوا في داهية.
وتابعت شقيقة المجني عليه: لحد ما هي جت من المنصورة أو من دكرنس على كلامها، وبعدين دخلت البيت سألتها على أخويا قالتلي معرفش عنه حاجة، قولتلها طب فين الحفرة قالتلي في المطبخ، وهناك لقيت بنتها الصغيرة ويوسف ابنها بيعيطوا وسألتهم مالكم مردوش، فالست قالت لابنها انزل شوف أحمد في الحفرة، وبعدين يوسف نزل وطلع قالي مفيش حد، فقولتله مش مصدقاك قالي لا مفيش حد تحت، وبعدين فضلت أعيط وأقول له يا ابني قولي الحقيقة فقالي عم أحمد ميت تحت، انهرت تماما وبعدها طلعت على القسم واتهمت اللي اسمه رشاد وميرفت إنهم اللي موتوا أخويا.
