رحمة أحمد: أحمد مكي دمه أخف في الحقيقة.. ومحمد سلام أتفه واحد في العالم
تحدثت الفنانة رحمة أحمد، عن الفنان أحمد مكي، مؤكدةً أنه يمتلك قدر من خفة دم أكبر من الظاهر على الشاشات، كما تطرقت للحديث عن عدة موضوعات أخرى.
وقالت رحمة أحمد خلال تصريحات تليفزيونية: أحمد مكي في الحقيقة دمه خفيف أوي واللي بيظهر على الشاشة ده ميجيش 20 % من العادي بتاعه، طول الوقت بيقول إيفيهات وقعدته فظيعة وبيضحك أوي.
وعن الفنان محمد سلام، قالت رحمة أحمد: محمد سلام أتفه واحد في العالم وهادي وبسيط وعمري في حياتي ما شوفته متضايق أو متعصب، وهو بيحب الغطس أوي فغالبا ده مأثر على شخصيته وهادي جدا.
وأضافت رحمة أحمد: ليا أخ توأم وبنحس ببعض وأنا وهو أقرب لبعض من أخواتنا التانيين، ومرة كان عندي مشكلة في الشغل وقاعدة بعيط بقالي ساعتين والوقت متأخر، لقيته باعتلي بيقولي إنتي كويسة؟.. واتخضيت جدا مع إني مكنتش مؤمنة بأن التوأم بيحسوا ببعض.
وكشفت رحمة أحمد، عن بداية التحاقها بالتمثيل، مؤكدة أنها بدأت من مسرح الكلية، وقالت: كان نفسي أدخل كلية علاج طبيعي بس المجموع وداني كلية علوم، ودخلت التمثيل من فريق المسرح بالكلية.
رحمة أحمد: أنا عايشة في بيت عيلة
واختتمت رحمة أحمد حديثها قائلةً: أنا عايشة في بيت عيلة، ونصايحي للبنات اللي هيعيشوا في بيت عيلة إن مبدئيا متكسرش حاجة في البيت لأن أنا أول حاجة كسرتها المطبقية، ولو جت فرصة قدمي لحماتك هدية، أو لو حاجة باظت في البيت هاتي بدالها، وفيه تكريمات كتير بعتذر عنها بسبب إني بخاف من التجمعات والزحمة وأعصابي بتتعب وبحاول أجهز نفسي نفسيا قبل أي مهرجان.
