هنا الزاهد: أحمد فهمي خلاني أهلاوية بالعافية.. وشهر العسل بتاعنا أوحش حاجة حصلتلي
تحدثت الفنانة هنا الزاهد، عن العديد من الموضوعات بحياتها الشخصية والمهنية، وأشارت إلى أن زوجها الفنان أحمد فهمي، أجبرها على أن تكون أهلاوية بدلًا من كونها زملكاوية.
وقالت هنا الزهد خلال لقائها مع الإعلامي عمرو أديب ببرنامج الحكاية: أنا كنت زملكاوية وأحمد فهمي خلاني أهلاوية بالعافية، قالي مينفعش تبقى زملكاوية مينفعش قدام الناس تقولي إنك زملكاوية وتكسفيني عشان الناس عارفة إني أهلاوي جدا، وقولت همشي أموري خلاص كده كده مليش في الكورة أوي.
هنا الزاهد: بتأثر بالكومنتات السلبية وبسأل الشخص كتبت كده ليه؟
وتابعت هنا الزاهد: عشان أنت اخترت تكون ممثل لازم تستقبل كل اللي هيتقال عليك، بس أنا بصراحة بتأثر ولما بقرأ حاجة بتضايق عشان أنا إنسانة، ولما بلاقي كومنت وحش بتأثر جدا وبقول لـ أحمد وممكن أبعت للشخص برايفت أقوله ليه كتبت كده، ويقولولي أصل كنا عايزينك تردي علينا.
وأضافت هنا الزاهد: أنا مش بعمل شعري خالص معظم الوقت مش بعمله وفي شغلي أغلب الوقت ببلبس بواريك لأني بخاف على شعري أوي إنه يبوظ أو يقع، وشعري في الحقيقة كيرلي ولو طلعت بيه كيرلي مش هيبقى حلو هيبقى كارثة، وبشيل هم إني أروح البحر عشان بيبقى مش ألطف حاجة بيبقى عامل زي علي ربيع لما بينشف، وفهمي بيشوفه وبيحبه عادي.
هنا الزاهد: شهر العسل بتاعي أوحش حاجة حصلتلي
واختتمت هنا الزاهد حديثها، مشيرةً إلى أن شهر العسل الخاص بها هي وزوجها أحمد فهمي كان كارثيا، قائلةً: شهر العسل باظ وكان أوحش حاجة حصلتلي، ووصلت فيه لـ 47 كيلو وجالي حصاوي على المرارة وكنت تعبانة جدا، بس خلاص هو قضاء وقدر.
