إلهام شاهين عن حكاية ألفريدو: كان فيه متربصين كتير وبعد عرض أول حلقة اعتذروا
أعربت الفنانة إلهام شاهين عن سعادتها بتكريمها من مهرجان الإسكندرية السينمائي لدول البحر المتوسط في الدورة 39 التي تحمل اسمها، وذلك بالأمس في حفل الافتتاح، الذي أقيم في مكتبة الإسكندرية.
وقالت إلهام شاهين خلال لقائها مع القاهرة 24: أعتبر ذلك التكريم هو تتويج لمشوار طويل على مدار 40 عام، ما بين السينما والمسرح والدراما، أحمد الله كثيرًا.
وعن نجاح حكاية ألفريدو، أردفت: كل شوية بقول مفيش دور جديد، فبلاقي الزهايمر متعملش فاعمله، وقبل ألفريدو قولت مفيش حاجة جديدة فلقيت زعيمة داعش، مازالوا بيفاجئوني إن فيه أدوار أنا معملتهاش، نفسي اعمل كل الأنماط اللي في الحياة بس يهمني تكون جديدة.
وتابعت إلهام شاهين: كان فيه متربصين كتير مستنيين أول حلقة عشان يهاجموا لأن فيه ناس هاجمت قبل ما ينزل المسلسل اول ما نزل البوستر فاتكبسوا كبسة وكتبوا احلى كلام واعتذروا جميعًا انا بشكرهم على العموم، ارائي ومواقفي ممكن متريحش ناس فبتخلقلي أعداء.
أما عن رأيها في مصير عدد من النجوم الذي صاروا على نفس نهجها ولكن كانت عواقب صراحتهم وخيمة، أضافت إلهام شاهين: لالا أنا أكبر من كده بكتير، الآراء على السوشيال ميديا لا بتقدم ولا بتأخر شكرًا لكل واحد بيهتم وبيشوف ويكتب رأيه اللي عنده حاجة حلوة يقولها واللي معندوش ميشوفهاش، هو حد فرض عليك حاجة؟
واختتمت إلهام شاهين حديثها، قائلةً: أنا بنصح اللي متضايق من فنان ميشوفوش ويريح دماغه، يعني تتفرج وتهاجم؟؟ أنا معنديش مشكلة مع النقد الحقيقي أنت لو شايفني مش بمثل كويس أو مهتمتش بدوري أو شكلي الخارجي مش مناسب للشخصية أو النص أنقد، لكن ياريت بيعرفوا ينتقدوا.
حكاية ألفريدو
تعرض حاليًا حكاية ألفريدو بطولة إلهام شاهين على شاشة قناة ON، وهي إحدى حكايات مسلسل 55 مشكلة حب، ويشاركها في الحكاية العديد من الفنانين، منهم: ندى موسى، أحمد فهمي، أمير شاهين، أحمد فريد، فتوح أحمد، عابد عنان، إنجي كيوان، محمد السويسي، محسن صبري، ياسمين بن داود، روان الغابة، والحكاية من تأليف عمرو محمود ياسين، وإخرجا عصام نصار.
