خالد زكي عن شائعات إفلاسه ووفاته: بيموتونا علشان التريند والدولارات.. والفن مصدر رزقي الوحيد
علق الفنان خالد زكي على شائعات إفلاسه ووفاته، بجانب حديثه عن سبب كثرة اعتذاره عن الأعمال الفنية، مؤكدًا أنه لم يؤمن مستقبل أبنائه المادي حتى الآن.
وقال خالد زكي، خلال ندوة تكريمه بمهرجان الإسكندرية السينمائي لدول البحر المتوسط: مش مظبوط إني أفلست وإني معييش فلوس، الحمد لله إحنا كلنا كويسين وهما بيموتوا نص الوسط الفني لمجرد التريند والدولارات، ولو مفيش في جيبي فلوس بقفل على نفسي الباب وآكل فول وطعمية والرزق ربنا هو اللي بيقسمه، فأنا بترك كل حياتي وخطواتي لله سبحانه وتعالى.
وتابع: الاعتذارات الكثيرة في حياتي، ونتيجة لهذه الاعتذارات لأني ماشي بأسلوب اقتصادي مالي، أنا شايف إنه غلط من الناحية العملية، أنا أصرف ما في الجيب يأتيك ما في الغيب، ولم أؤمّن أولادي ماديًا حتى هذه اللحظة.
خالد زكي: الفن مصدر رزقي الوحيد.. وبقلق لو حصلي حاجة أولادي يحتاسوا
وأضاف: لكن الهاجس الأكبر اللي الواحد بيدور في يذهنه كثيرًا أن أنا ليه معنديش أي مشروع تجاري خالص؟ أنا مصدر رزقي الوحيد هو التمثيل، مفيش 10 جنيه بتجيلي من الناحية التجارية، وبقلق لو الواحد حصله حاجة أولادي يحتاسوا، لأن عيشتهم كويس جدًا ومبسوطين، ولكن بدعو ربنا أن يوم ما ييجي اليوم بتاعي أبقى واقف على رجلي، ومحتاجش أي حد لا ماديًا ولا معنويًا.
خالد زكي: مش هوافق على أي عمل مسرحي لمجرد التواجد
وتطرق الفنان خالد زكي للحديث عن عمله المسرحي، قائلًا: أنا اتخرجت سنة 1973، واتعينت في المسرح القومي سنة 1976 وفضلت فيه لحد ما طلعت على المعاش لحد 2010 بدرجة فنان قدير، وقدمت مسرحية أو اتنين في القطاع الخاص وعملت 4 أو5 مسرحيات في الحكومي.
واستكمل: بعد ما قدمتهم اتطلبت في مسرحيات وكان نفسي أعمل مسرح ملحمي في البدايات ولم تتح ليا الفرصة، وعلى الرغم من ده كان بيتعرض عليا مسرح كتير لكن مش اللي عايزه ومش هوافق لمجرد التواجد، وبحب كل نقطة دقيقة في العمل الفني، عشان لما اشتغل مع المخرج ابقى فاهم عايز يوجهني فين، بحيث ابقى عجينه مطيعة لصناع العمل، وده لم يتم توافره في المسرح واعتذرت ده كتير.
خالد زكي: مسلسل بابا عبده كان بتاعي وبقى نقطة فارقة في حياة فاروق الفيشاوي
كما تحدث خالد زكي، عن تفاصيل رفضه مسلسل بابا عبده، قائلًا: اتعرض عليا مسلسل بابا عبده مع الأستاذ محمد فاضل وكان الدور ضد الأب وخفت أنه يتكره، ولكن كانت خبرتي محدودة واعتذرت للمخرج محمد فاضل وقدم الدور النجم الراحل فاروق الفيشاوي وكانت نقطة فارقة في حياته.
واستطرد: بعد سنتين المخرجة إنعام محمد علي عرضت عليا سهرة تلفزيونية بعنوان حب بلا ضفاف وكانت المرة الأولى أن يقيم التلفزيون مهرجان ويقدم جوائز، وكانت قصة وسيناريو الراحل أسامة أنور عكاشة وكان دور أيضًا مكروه حتى النهاية، ومسكت بإيدي وسناني في الدور، واعتذرت عن عمل آخر مع المنتج رياض العريان من أجل هذا الدور.
