عفاف رشاد: ابتعدت عن الفن لفترة بسبب تربية ابني.. وأنا ضد عمليات التجميل
تحدثت الفنانة عفاف رشاد، عن أكبر تحديات وإنجازات واجهتها في حياتها، بجانب رأيها في عمليات التجميل.
تحدثت عفاف رشاد خلال تصريحات خاصه للقاهره24، عن أكبر تحديات واجهتها في حياتها على المستوى الشخصي، وقالت: أكبر مجهود بالنسبالي عملته إني قدرت اربي ابنى عمر واكبره، أنا قعدت من الفن ست أو سبع سنين علشان أقدر أخليه حد كويس وقعدت أربيه لحد ما خليته دكتور زي ما أنا عايزة، وأنا لا اتجوزت بعد طلاقي من بابه ولا ارتبطت بأي حد، أنا ارتبط بابني علشان هو ابني وحبيبي وكل ما ليا.
وتابعت عفاف رشاد: أنا لو كنت سيبت ابني ورميته وضيعته وقعدت أشتغل وأعمل بطولات كنت هكسب إيه من الفن، أنا حبيت أربي جيل للمجتمع، يوم ما أحس إني تعبانة ومش قاردة أقوم من سريري هروح لابني علشان يداويني، والأكيد هعجز ومحدش هيخدمي غير ابني.
وحول رأيها في عمليات التجميل، ردت عفاف رشاد: أنا ضدها جدًا، الناس قعدت تقول إني عملت عملية تجميل ومش عارفة إيه وأنا مفيش الكلام ده خالص.
وتابعت عفاف رشاد: الكل حاول يكلمني وقتها علشان يشوفوني ويعرفوا أنا عملت عمليات ولا لأ، لكن أنا مش هطلع أقول إني مش عاملة عملية تجميل، وأكيد في حاجات كتير في البلد أهم من ده، ومفيش أحلي من خلقت ربنا ولا تقوليلي فيلر ولا بوتكس، منلعبش في خلقه ربنا عشان جميلة.
