عفاف رشاد: أنا ضد تكريم الفنانين بعد ما يموتوا.. والناس فاكرة إننا بناخد ملايين ومليارات
كشفت الفنانة عفاف رشاد، عن رأيها في فكرة تحريم مهنة الفن، بجانب رأيها في تكريم الفنانين بعد وفاتهم وإمكانية دخول نجلها المجال الفني.
وقالت عفاف رشاد عن رأيها في تحريم مهنة الفن خلال تصريحات خاصة للقاهرة 24: ليه الفن حرام إيه اللي حرمه، أنا عن نفسي قدمت أعمال فنية على مدار السنين وأكيد الناس شافت أعمالي، أنا معملتش حاجة محرمة ياما ناس بتشتغل في مهن تانية وبتعمل حاجات محدش شايفها اللي بيقول المقولة دي أنا ضدها.
وأضافت عفاف رشاد: الواحد لو بيشتغل وبيراعي ربنا في شغله ربنا هيقف جمبه، كل الدنيا فيها الحلو وفيها الوحش، يعني مثلا لو مهندس استرخص وبنى بمواد ضعيفة للناس، تلاقي العمارة وقعت يبقى ده حرام برضو.
وعن فكرة تكريم الفنانين بعد وفاتهم، أوضحت: أنا أتمنى طول ما الفنان موجود يُكرم وهو عايش ويتبسط بحياته وبنفسه، يعني أتبسط إزاي بنفسي وأنا ميتة، بتكرموني طيب ما تكرموني وأنا موجودة علشان أسعد بحياتي، إنما لما بنكبر ونعجز والناس تشوفنا وتقول يا حرام دي عجزت دي كبرت طيب ما تكرموني وأنا في شبابي وعزي واتبسط بالتكريم وأنط وأفرح على المسرح وأكون فرحانة ومبسوطة.
وأكملت عفاف رشاد: ليه يكرمونا متأخر فنفرح بيه في آخر عمرنا أو بعد مماتنا ملهاش لازمة بقي، يعني أنا لو مت وأهلي أخدوا التكريم، أنا كده موت قبل ما أسعد بتعبي وشقايا، أنا ضد تكريم الفنانين بعد ما يموتوا أو لما يكبروا.
وحول إمكانية دخول نجلها عمر المجال الفن، علقت عفاف: أنا معنديش غير ابن واحد اسمه عمر السبكي دكتور جراح مخ وأعصاب في إنجلترا، هو ده اللي طلعت بيه من الدنيا أبوه منتج وأنا ممثلة، بس هو أصلا محبش المجال الفني أساسًا وحب الطب وعاش في الطب حياته كلها.
واستكملت عفاف حديثها: بالرغم أن كل الناس عايزة تدخل مجال الفن، وفاكرين إن الفنانين بياخدوا الملايين والمليارات، لكن ده مبيحصلش فيه ممثل كبير وممثل دور تاني، وفيه ناس كتير عايز تسيب المهن بتاعتها علشان تروح تمثل وبتدور على ورش علشان تروح تمثل.
