مسلم: مبحبش أغني مهرجانات.. وبهتم بالكلمات الراقية ووقت المُستمع
كشف المطرب مسلم، عن إمكانية تعاونه مع أحد مؤديين أغاني المهرجانات في عمل فني، مؤكدًا إنه حريص على انتقاء كلمات أغانيه واحترام وقت الجمهور، بجانب الكشف عن رأيه في تطور الذكاء الاصطناعي.
وقال مسلم خلال لقائه مع القاهرة 24: صعب إني اتعاون مع مطرب مهرجانات لأن مش ده الشيء اللي أنا بحبه، أنا بغني علشان بحب الغناء، وبغني نوعية الأغاني اللي بحبها، والموضوع بيتمحور على إني أكون مبسوط أنا بتبسط بشغلي عمومًا، بس المهرجانات مش من أولوياتي، وهي ممكن تكون من أولاويات ناس كتير جدًا ربنا يرزقهم ويكرمهم.
وتابع مسلم: أنا بهتم جدًا بالكلمة واللفظ والوقت اللي بخده من الناس اللي بيسمعوني، شيء صعب أنك تكون بتسرق أو بتسحب وقت الناس في أنك تقولهم كلام ممكن يكون مسيء نوعًا ما.
كما كشف مسلم، عن رأيه في تطور الذكاء الاصطناعي، قائلًا: عجبني الذكاء الاصطناعي بس في نفس الوقت هو يقلق الواحد، ولكن إحساس المطرب نفسه صعب يتعوض مهما حاولت تعمله محاكاة، هو ليه مميزات وليه عيوب بس يا رب متكونش كتيره جدًا ومن مميزاته أنك تقدر تسمع أي أغنية عجباك بصوت مغني تاني أنت بتحبه عيوبه بقي زي حقوق الملكية.
وعن أعماله في الفترة المقبلة، فعلق مسلم قائلًا: أحضر لألبومي الجديد ويا رب يعجب الناس ومكون من 15 أغنية أطرح أول أغنية منه يوم 10 أكتوبر.
