يوسف عثمان يكشف عن صعوبات واجهته في بداية مشواره: كنت بترفض من مكاتب الكاستينج
قال الفنان يوسف عثمان إنه يهتم بتقديم أدوار مختلفة ولا يقدم أي عمل شبيه لدور قدمه من قبل، وإنه لا يخاف من المخاطرة كما كان من قبل، بجانب حديثه عن الصعوبات التي واجهته في بداية مشواره.
وأضاف يوسف عثمان في لقائه مع القاهرة 24: زمان كنت بخاف من الريسك ولكن فيه حاجات لازم الواحد ياخد فيها الخطوة، لأنه ممكن فعلا تجيب نتيجة، ولو جابت نتيجة بتفرق مع الواحد، وأنا زمان ما كنتش باخد الريسك وبخاف من التتباعات ومع الوقت الواحد اتعلم من الحياة ومن اللي حواليه أن الريسك شيء مفيد جدا، ومش بس الريسك أني أقدم دور معين ولكن لو في دور عملت شببه قبل كده ممكن ممكن اخد ريسك وأرفضه.
وأكمل: مرة سمعت عادل إمام في لقاء بيقول إنه ممكن يرفض دور بطولة مقابل دور تاني، لكن فيه حاجة مختلفة ومقدمهاش قبل كده ومش بس الريسك أنك تعملي حاجة وكمان أن ترفضي حاجة.
وأكد يوسف عثمان أنه لا يندم على دور قدمه حتى لو شعر أنه كان من الممكن أن يقدمه بشكل أفضل، معقبًا: مش بندم أحيانا بقول أني كنت ممكن أقدم الدور بطريقة أحسن وبرجع في الآخر بقول دي كانت خطوتي وقتها ومذاكرتي وقتها وتحضيري وقتها وده بينطبق على أي حد بشكل عام لأن الشخض اللي هو عليه النهارده مش الشحص اللي كان عليه امبارح.
وأشار يوسف عثمان إلى أنه واجه بعض الصعوبات في بداية مشواره، وكان يذهب لمكاتب الكاستينج ويتم رفضه، مضيفًا: في فترة معينة مكانش فيه حاجة مناسبة ليا في وقتها وكان جزء كبير أوي بلوم عليهم وجزء بسيط بلوم عليا وبحاول أطور من نفسي كممثل.
