منال سلامة: مفيش حاجة اسمها فنان درجة أولى أو ثانية.. واحنا بنشتغل بشكل عشوائي
علقت الفنانة منال سلامة على تصنيف الفنانين لدرجات مختلفة كفنان درجة أولى ودرجة ثانية وغيرها من الدرجات، مشيرةً إلى أن ذلك الأمر يُقلل من شأن الفنان المصري.
وقالت منال سلامة خلال حوارها مع القاهرة 24: مفيش حاجة في الفن اسمها درجة أولى ودرجة تانية أنا مش موظفة حكومة، كدة بتقللوا من شأن الفنان المصري اللي هو واجهة للبلد، فميصحش، مفيش حاجة اسمها كدة، فيه حاجة اسمها عرض وطلب.
وأضافت: التلفزيون معتمد على النص والمخرج والممثل وليس النجم، بينما السينما تعتمد فقط على النجم، فمينفعش نعمل تصنيف وفئات، عيب فيه خبرة وتاريخ وناس تعبت في المهنة وشقيت فيها.
أما عن رأيها في قرارات نقابة المهن التمثيلية بشأن أجور وعدد ساعات عمل الفنانين، أردفت منال سلامة: دستوريًا عدد ساعات العمل 8 ساعات، مجازًا عدد ساعاتنا بقيت 12 ساعة عشان عملنا شاق، أكتر من كده هتاخدوا إيه من الفنان، لا طاقة ولا شكل.
منال سلامة: احنا بنشتغل بشكل عشوائي لا يُنتج إلا عشوائية
وأضافت منال سلامة: احنا ليه بنخترع العجلة؟ اقسم بالله لو معانا النص كامل وتم تحضيره كويس وتفريغه كويس هيتعمل في 12 ساعات تصوير وهيطلع نتائجه كويسة.
وواصلت منال سلامة حديثها قائلةً: المفروض نحضر لرمضان 2025 من دلوقتي ويبقى فيه جدول، ونعمل ميزانيات وندي فرصة للمؤلفين يألفوا والمخرجين يذاكروا والمنتجين يحضروا كويس، إنما احنا بنشتغل بشكل عشوائي لا ينتج إلا عشوائية.
