تامر أمين عن فيلم جولدا: العمل روج لمحاصرة القوات المصرية.. وخدوا بالكم أولادكم بيشوفوا إيه
علق الإعلامي تامر أمين عن فيلم جولدا بطولة الفنانة الأمريكية هيلين ميرين، والذي يسرد السيرة الذاتية لـ رئيسة الوزراء الإسرائيلية جولدا مائير في 1973، معلقًا: الفيلم مطلع صدمة وخراب في إسرائيل.
وقال تامر أمين خلال برنامجه آخر النهار: خلوا بالكوا من المصادر اللي بتاخدوا منها معلوماتكم..الولاد الصغيرين اللي اتولدوا في الألفينيات ومحضروش وقت الحرب المجيد ووثائق الحرب، بياخدوا معلوماتهم دلوقتي من النت والأفلام، وللأسف التاريخ بقى بيكتب على هوى كتابه مش على حسب الوثائق والتاريخ ومن هنا الخطورة والفيلم تحس إنه فيه سم في العسل.. فيلم بيرفض الأيام اللي سبقت 6 أكتوبر.
وأضاف تامر أمين: فيلم جولدا مطلع صدمة وخراب في إسرائيل وتدمير خط بارليف، لدرجة أني استغربت وكأن إحنا المصريين اللي عاملينه، تحس أن النزاهة في عرض الحقائق ده، ولحد مشهد معين كانت كل حاجة تمام، وبعدها حسينا أننا في فيلم بمؤلف ومخرج تانيين.
واستكمل تامر حديثه: بدأوا يتكلموا عن الثغرة وعملوها انتصار مبين وإن هما اللي حاصروا القوات المصرية، وكل ده مش حقيقي فلازم نذكر الناس ونقول خدوا بالكم أولادكم بيشوفوا إيه.. ولازم تقعدوا معاهم وتفهموهم قد إيه العدو بيزيف الواقع والتاريخ.
فيلم جولدا
ويدور فيلم جولدا حول السيرة الذاتية لرئيسة الوزراء الإسرائيلية جولدا مائير والتي لقبت بالمرأة الحديدة في مجتمع اليهود، والقرارات الصعبة، التي اتخذتها خلال حرب السادس من أكتوبر.
