محمد مختار: رانيا يوسف مش نجمة صف أول.. وبتستخدم بنتي ضدي
علق المنتج محمد مختار، على تصريحات طليقته الفنانة رانيا يوسف، بأنها أصبحت من نجمات الصف الأول بعدما انفصلت عنه، بجانب تعليقه على تصريحات ابنته نانسي، والتي أكدت إنها لا تريد أي مساعدة من والدها.
وقال محمد مختار في تصريحات تلفزيونية، عن تصريحات رانيا يوسف: من حقها تقول أي حاجة، ويارب تبقى من نجوم الصف الأول أنا أتمنى، ولكن هي لسة مش نجمة صف أول، ده موضوع كبير أوي زي منى زكي وياسمين عبد العزيز وهند صبري، ربنا يوفقها وتبقى من نجوم صف أول.
أما عن تصريحات ابنته نانسي، فعلق محمد مختار قائلًا: أنا بلوم على والدتها في حاجة إن لو في حاجة مش متفقين عليها، متستعملش نانسي في حاجة زي كده، ودي تاني مرة نانسي بتغلط في حاجات زي ما لبستها فستان عليه مشاكل في مهرجانات، ودي حاجات مش لطيفة.
وتابع محمد مختار: أنا منفصل عن رانيا يوسف بقالي 14 سنة وبعيد كل البُعد، أنا راجل مرتبط وسعيد في حياتي جدًا ودلوقتي أحلى سنين عمري.
ابنة رانيا يوسف تهاجم والدها: مش عايزة من محمد مختار حاجة
وسبق وأن هاجمت نانسي ابنة الفنانة رانيا يوسف، والدها المخرج محمد مختار، وقالت في تصريحات تلفزيونية: أنا مش عايزة من محمد مختار حاجة، مش عايزين منه أي حاجة، حتى لو فيلم أو مهرجان أو أي حاجة، أنا كنانسي مش عايزة منه أي حاجة.
كما أكدت الفنانة رانيا يوسف، في ذات اللقاء إنها نادمة على زواجها من المنتج محمد مختار، قائلة: ندمت وزعلت إني اتجوزت من محمد مختار، والحمد لله بعد ما اتطلقت منه بقيت نمبر وان ومن نجمات الصف الأول، والحسنة الوحيدة اللي طلعت بيها منه هي بناتي.
