شقيقة سعاد حسني: السندريلا تزوجت عبد الحليم حافظ 6 سنوات.. ووحيد حامد كان هيقدم قصة حياتها
حلت جيهان عبد المنعم، الشقيقة الصغرى للفنانة الراحلة سعاد حسني، ضيفة على الإعلامية منى الشاذلي في برنامجها معكم، المذاع عبر شاشة قناة ON، وتحدثت خلال اللقاء عن تفاصيل حياة السندريلا الشخصية، وتطورات قضية مقتلها في لندن.
ونستعرض لكم أبرز تصريحات شقيقة سعاد حسني:
- حسني والد سعاد حسني تزوج واحدة اسمها لطيفة وأنجب 8 أبناء بينهم نجاة، وبعدها تزوج من جوهرة أمي، وأنجب 3 بنات سعاد، وكوثر، وصباح.
- بعد طلاق أمي من حسني، تزوجت من والدي عبد المنعم، والثلاث بنات عاشوا معانا، وسعاد حسني هي من ربتني، وأنجب والدي 6 أبناء كلهم تبدأ أسماؤهم بحرف الجيم ومنهم جنجاه.
- هي كانت عايشة معانا في البيت وربتني، ولما بدأت تكبر اشتغلت في التليفزيون، وغنت في بابا شارو، لكن كان نفسها تكون مطربة زي أختها نجاة مش ممثلة.
- سعاد حسني وعبد الحليم حافظ كانوا متجوزين 6 سنين ونص، وكان بيروح عندها البيت وتروح عنده.
- عبد الحليم كان عارف إن إخوات سعاد حسني مهمين عندها، فكان بيعاملنا زي ولاده، ويشيلني أنا وأخويا جلاء على رجله وإحنا صغيرين.
- غير صحيح أن سعاد علاقتها بأهلها وحشة، وكانت موجودة في كل مناسباتنا وفي عزائم رمضان وأعياد ميلادنا، وكان ظهرها واجعها لكن كانت تاخد مسكن وتتحامل على الألم علشان تنبسط معانا.
- فيلم الزوجة الثانية حصل فيه موقف، عمدة القرية اللي صوروا فيها الفيلم هيأ لهم كل حاجة لإنه كان عايز يتجوزها.
- سعاد حسني كانت ساعتها متجوزة، وكانت دمها خفيف فقالت للعمدة نخلص الفيلم وبعدها نشوف، لكن صمم يتجوزوا قبل ما فريق العمل يمشي.
- أتمنى قصة سعاد حسني تظهر للنور، علشان الناس كلها تعرف حقيقتها من ولادتها وحتى وفاتها.
- أنا كتبت قصة حياة سعاد حسني في 3 سنين ونصف، ووحيد حامد تحمس وقال يشرفني أعملها، ولازم تكون ممثلة جديدة عندها روح سعاد حسني ومش لازم تكون شبيهة لها في الشكل، لكن توفى قبل تقديم العمل.
- الفترات الصعبة في حياة سعاد حسني كانت كثيرة، وأولها لما مات أخويا جلاء، وراحت عنده البيت وحاولت تصحيه وهي غير مصدقة وفاته.
- بعد ذلك الموقف كانت وفاة أمي، وبعدها وفاة صلاح جاهين، ولما انفصلت عن علي بدرخان، وبعدها لما بدأت عندها آلام الظهر وأصيبت بالعصب السابع.
- العصب السابع أصابها بسبب المروحة والمكيف، وفجأة صحيت لقت في كسرة في عينها وإتخضت، وللأسف أهملت العلاج والدكتور كتب لها كورتيزون.
- العلاج بالكورتيزون تسبب في زيادة وزنها، وبدأت تعاني من آلام الظهر بالإضافة إلى تآكل الأسنان، وتضايقت لأنها تحتاج تعبيرات العين والوجه في التمثيل.
- بعد مشاركتها في فيلم الراعي والنساء قررت تختفي عن الأنظار، وحتى الفيلم عملته مجاملة للمخرج علي بدرخان، وكانت أثناء التصوير تعاني من آلام شديدة في الظهر، وعملت شريحة للظهر في فرنسا.
- رفضت تاخد فلوس من حد وسافرت تتعالج على حسابها، لكن رئيس الوزراء الأسبق كمال الجنزوري قال لازم تتعالج على نفقة الدولة.
- جنجاه أختنا حاطة إثباتات كتير عن مين اللي قتل سعاد حسني في كتاب كتبته، والقضية اتقفلت في لندن في حاجات حصلت كتير هناك مش صحيحة، والأسرة متأكدة وعلى قناعة إن سعاد قُتلت.
