مصرية بفلسطين: إحنا لا بنصرخ ولا بنصوت قاعدين مستنيين الضربة والموت| خاص
كشفت إيمان البيك، المصرية المتواجدة بفلسطين، والحاصلة على ذهبية العالم في رمي الرمح، تفاصيل ما تتعرض له هناك منذ بداية طوفان الأقصى الذي اندلع أثناء تواجدها هناك لإنهاء بعض الأوراق.
بدأت إيمان البيك، المصرية المتواجدة بفلسطين، حديثها مع القاهرة 24، قائلة: حاجة صعبة جدًا، مافيش مياه، مافيش كهرباء، الطيارات بتضرب وبنسال نفسنا كل يوم يا ترى الطيارة هتنزل على راسي ولا لا، دماغنا هتفرقع من كتر الصواريخ.
مصرية في فلسطين: دي إبادة بتحصل في فلسطين
وتابعت المصرية بفلسطين: الناي بتموت جنبنا، دي إبادة بتحصل في فلسطين، لتدمير كل البنية التحتية، محدش فاهم حاجة، مستطردة: ربنا شايف اللي بيحصل الناس اللي ماشية بتموت وهي ماشية، في خان يونس عاملين دخان بيخنق الناس، البيوت بتتهد عليهم وبيطلعوهم بالدور.
وحكت إيمان البيك عن جدعنة الفلسطينيين حتى في أكثر الأوقات العصيبة بالنسبة لهم، موضحة: اكلونا ومش عندهم أكل وقسموا معانا المياه واللبس وهم مش عندهم، وأما بنروح المعبر بنشوف بعض، غير كدة أحنا طول الوقت متفرقين، وأول ما بنروح المعبر بيتضرب عشان منروحش تاني.
واستكملت: أحنا شوفنا دمار شامل، بس بنقول لنفسنا أمر الله نافذ ولله جند في الأرض، أحنا لا بنصرخ ولا بنصوت قاعدين مستنين الضربة والموت، واختتمت حديثها بآية من الذكر الحكيم: «إن الله اشترى من المؤمنين أنفسهم وأموالهم بأن لهم الجنة يقاتلون في سبيل الله فيقتلون ويقتلون وعدا عليه حقا في التوراة والإنجيل والقرآن ومن أوفى بعهده من الله باستبشرو ببيعكم الذي بايعتم به وذلك هو الفوز العظيم».
