بعد طرده من العمل لدعمه فلسطين.. كريم قباني: اللي حصلي ولا حاجة بالنسبة للي بيعيشه إخواننا في غزة | خاص
تداول متابعو مواقع التواصل الاجتماعي عددا من المنشورات بشأن التيك توكر المصري كريم قباني، بعدما ظهر في مقطع فيديو يروي فيه كواليس فصله من العمل في فرنسا، نتيجة تعاطفه مع القضية الفلسطينية.
أول رد من كريم قباني بعد فصله من عمله لدعمه فلسطين
وأشار التيك توكر كريم قباني، في مقطع فيديو له عبر حسابه بموقع تيك توك، إلى أنه تم طرده من العمل بسبب تضامنه مع القضية الفلسطينية، قائلا: مشوني من الشغل عشان آرائي مثيرة للجدل، وفيه زميلة في العمل دائمًا تنشر دعمها لقوات الاحتلال الإسرائيلي عبر خاصية استوري.
وقال كريم قباني، في تصريحات خاصة لـ القاهرة 24: اللي حصلي ده ولا حاجة بالنسبة للي بيشوفه ويعيشه إخواننا في غزة، وأنا بإذن الله هلاقي شغل تاني قريب، وفيه ناس كتير هنا فرنسا مصريين وفرنسيين بيساعدوني.
وأضاف: مش أنا لوحدي اللي اتكلمت عن فلسطين، وفيه غيري كتير مسكتوش عن الحق ودعموا القضية الفلسطينية، وتعليقي الوحيد على اللي حصل معايا إن الحمد لله على كل شيء.
ووجه كريم قباني، رسالة دعم لأهالي غزة، قائلا: أهالينا وإخواننا في غزة.. أنا بدعمهم من قلبي في أي مكان، سواء هنا في فرنسا أو على السوشيال ميديا، وعايز أقولهم لا تيأسوا وإن شاء الله خير، وربنا مع الحق، وحسبي الله ونعم الوكيل وبشكر المتابعين اللي تواصلوا معايا.. وكلامهم هون عليا زعل الفصل من الشغل.
وفي وقت سابق، قال التيك توكر كريم قباني: فيه زميلة في الشغل كل يوم بتنزل ستوري عن البلد التانية وأنا بسكت وبروح وأشتغل معاها ومبتكلمش كلمة.. كمان مش عايز أتعصب وأغلط، وهي كانت بتحرق دمي وبتسألني عن تأييدي ودعم الفلسطينيين، ورديت عليها إني بتعامل رسمي معاها وهي كمان المفروض تكون كدا، وساعتين بنتكلم في الموضوع وبشرح لها التاريخ، وبعدين لقيت صاحب الشغل جاي وبيسأل انتوا ليه مش بتشغلوا، قالت له كريم بيتخانق على اللي بيحصل في العالم معايا.
واستكمل كريم قباني تصريحاته قائلا: صاحب الشغل قالي دا بجد؟، وأنا رديت قولت له أنا مش بتخانق، لكن هو قالي كريم أنت بقالك فترة بتنزل استوري وريلز ودا مش أصح حاجة عشان عندك فولورز كتير والعملاء مش هيعجبهم كدا، قولتله يعني إنت عايزني أوقف اللي بعمله ده، ولكن هو قالي لأ.
وأضاف: كلموني يوم إجازتي من الشغل وقالولى تعالى، وفعلًا روحت لقيتهم بيمضوني على ورقة فيها بنود إن إحنا الإتنين نستغنى عن بعض، وقبل ما أروح لقيتهم خرجوني من جروب الواتس آب، أنا حسيت بالظلم شوية، بس ده ولا حاجة بالنسبة للي بيتظلموا في فلسطين.
