هنا شيحة باكيةً على أحوال أهل فلسطين: الناس هناك معدمة وعايشين في الشارع
أعربت الفنانة هنا شيحة عن حزنها الشديد وتأثرها بالأحداث التي تحدث لفلسطين وتحديدًا أهل غزة؛ بسبب تعرضهم لقصف بشكل مستمر وإبادات من قِبل الجيش الإسرائيلي.
ونشرت هنا شيحة عدة مقاطع من الفيديوهات عبر حسابها الرسمي بموقع انستجرام، معلقةً من خلالهم: كنت أحب يبقى وشي أحلى من كدة وأنا بكلمكم، أحب أروح أصبغ شعري، أحب أعيش حياتي بشكل طبيعي، أحب أنام من غير ما أصحى في نص الليل مخضوضة، مش بعرف أنام من المناظر المرعبة اللي بنشوفها كل يوم واللي محدش يتمنى يكون في مكان الشعب ده ولا الأمهات دي ولا الأطفال دول، ومجرد التخيل إنك مكانهم مؤلم جدا وفيه قهر.
هنا شيحة: الناس في فلسطين معدمة وعايشين في الشارع
وأشارت هنا شيحة، إلى كيفية مساعدة أهل فلسطين، قائلةً: التفكير في كيفية مساعدتهم، إننا نفضل نتكلم عن الموضوع نفضل ننشر ونساند بكل الطرق الممكنة، اللي يقدر يساعد بدوا بهدوم أو بأي حاجة هتفيد الناس، الناس بقت معدمة، الناس بقوا عايشين في الشارع، وفي مليون طريقة نقدر نساعد بيها ومليون مؤسسة.
وأردفت هنا شيحة باكيةً: عندنا منظمات خيرية زي صناع الخير وبنك الطعام وبنك الكساء والهلال الأحمر، كل دي مؤسسات بتعبت مساعدات لحد غزة، خلونا كلنا نبعت مساعدات ويا رب الأزمة دي تنتهي على خير بدون قصف تاني ومن غير إبادة تاني لأن ده فوق الوصف وفوق تحمل البشر، لكي الله يا غزة وحسبي الله ونعم الوكيل وربنا معاكم.
واختتمت هنا شيحة حديثها، معتذرةً للصحفيين الذين رفضت تسجيل لقاءات معهم في تلك الفترة، قائلةً: أنا بعتذر لكل الصحفيين اللي بيكلموني الفترة الأخيرة وعايزين يعملوا لقاءات وحوارات عن مسلسل ما تيجي نشوف، أنا بجد بعتذر ومش عايزة حد يزعل مني، أنا مبسوطة إنكوا بتكلموني بس الوضع فعلا صعب جدا وهرد على كل الناس، وهنعمل ده قريبا جدا إن شا الله وبشكركم على تقديركم وعلى رأيكم.
