أسما شريف منير عن منتقديها: لما طلعتني عن الإسلام أنت كده دكر؟!.. بلاش توكلوا نفسكم تربوا الناس
علقت الإعلامية وخبيرة التجميل أسما شريف منير، على الانتقادات التي تواجهها طيلة الوقت وخاصة منذ أن أقدمت على حلاقة شعرها خلال الفترة الماضية، بجانب تعليقها على أحداث غزة وما يعانيه الشعب الفلسطيني خلال حربهم مع إسرائيل.
وقالت أسما شريف منير في بث مباشر عبر حسابها الشخصي بموقع تبادل الصور والفيديوهات انستجرام: الناس اللي بتشتم دي متعلمتش حاجة هو أنت شايف لما بتشتم حد بتاخد حسنات؟ أنت كده دكر أنت كده محصلتش؟ بتتعلم إيه وبتعلم اللي حواليك إيه؟، ربنا يهديهم وأنا ولا بفكر في الناس دي.
وتابعت أسما شريف منير: اللي بيزعلني أن الناس اللي بتشتم دي أكبر ناس مُدعيين ولو دخلنا عندهم بنلاقي كاتبين لا إله إلا الله وفلسطين الحرة، دول ناس مش حقيقية وكدابة، الناس مبقاش عندها دم وفي كمية نفاق وكدب وانفصام في الشخصية رهيبة، لو أنت مسلم أو مسيحي الديانتين بينادوا بالاحترام، لما انت تصدر ده للناس متزعلش لما يقولوا علينا همج.
وأضافت: أنا مش شيخة أنا إنسانة نفسي اتعامل مع بني آدمين طيبين، والدين أخلاق سواء إسلامي أو مسيحي، واللي الناس بتعمله ده مش منطقي، لازم نتعلم منبقاش همج ونعمل اللي دينا قال عليه باللي نقدر عليه، أنا مش محجبة وبغلط في حاجات، واللي بيحصل ده لازم يعلمنا حاجة، بلاش إدعاء وتوكلوا نفسكم إنكم تربوا الناس، ظبط نفسك الأول وشوف الطريقة اللي المفروض تكلم بيها الناس ولو عايز تساعد في هداية حد تتكلم إزاي.
واستكلمت: المفروض تقوله ده الدين حلو أوي وافتح نفسه على الدين، لو أنت شايف إني مش مسلمة وطلعتني من الديانة، هل علشان أدخل تاني الإسلام شايف أن دي الطريقة اللي تدخلني بيها تاني؟ يا جماعة والله العظيم ما ينفع اللي بيحصل ده، والله في ناس مافيش فيها فايدة وموجودين علشان نتعلم أن منبقاش زيهم، أنا مش زعلانة إنهم بيشتموني أبدًا ومحصنة نفسي منهم، اللي مزعلني أن في ناس فعلًا بيصدقوا نفسهم لدرجة الجنان وشايفين أنهم صح.
أسما شريف منير عن أحداث غزة: الإسلام بين قد إيه ناسه طيبين.. ولازم تحمد ربنا أن عندك بلد وجيش يحميك
كما علقت أسما شريف منير، على أحداث غزة، قائلة: اللي بيحصل ده ليه سبب على أصعدة كتير أوي، والإسلام بان قد إيه في ناس طيبين وقد إيه ناس بتخاف على بعض وقد إيه حبنا للبلد، بشوف على أكونتات كتير بتحاول تساعد وتعلي صوتنا وفي ناس بتتريق وتعمل ميمز بتضحك، وفي ناس بتشتم وناس بتحبط ناس بتعمل حاجات.
وتابعت: لو اللي بيحصل ده مش هيعلمنا حاجات كتير، في درس في اللي بيحصل ده لازم الواحد ميبقاش مُدعي، وفي ناس بتكتب عنده فلسطين الحرة وتلاقيه بيشتم وبيعمل حاجات مش حلوة في حياته، اللي بيحصل ده بينعكس علينا في حياتنا ولازم الواحد اللي مبيصليش يحاول يرجع يصلي، الالتزام صعب، واللي بيبقى عنده نقمة على البلد بتاعته أو أي حاجة بتحصل في سياستها لازم يحمد ربنا أن أنت عندك بلد وجيش بيحميك.
