ديانا كرزون باكية بسبب أحداث غزة: ما يحدث لا يستوعبه عقل
أعربت الفنانة الأردنية ديانا كرزون، عن حزنها الشديد بسبب أحداث فلسطين وتحديدًا ما يحدث لـ غزة وأهلها، كما كشفت رأيها في التزام بعض الفنانين الصمت تجاه تلك القضية.
وقالت ديانا كرزون خلال تصريحات تليفزيونية لها: الأحداث اللي بتحصل في غزة مش بيستوعبها العقل، المشاعر صعبة جدا، مشاعر غضب وحزن وخيبة أمل، والسلاح القوي بالنسبالنا هو السوشيال ميديا عشان نبين للناس وللعالم إيه اللي بيحصل في فلسطين، وكرسنا حساباتنا بالقدر الممكن عشان نقدر ننقل إيه اللي حصل في فلسطين، وعشان نقدر نكذب الأخبار الكاذبة اللي بتطلع.
ديانا كرزون: أنا مُجندة وكل شخص المفروض يكون مراسل
وتابعت باكية: بقول للناس أنا فنانة بس دلوقتي أنا زيي زيكم، أنا مجندة وكل شخص المفروض دلوقتي مفيش حاجة قدامه غير الدعاء، وإنه يستخدم السوشيال ميديا بتاعته ويحس نفسه مراسل وصحفي ويحس إنه موجود في الموقع نفسه، والتأثير مش بس للفنانين كمان للاعبين الكرة والمشاهير، وبعتقد كل شخص دلوقتي هو مراسل.
وأردفت ديانا: وكتير شوفنا بنات وولاد مش مشهورين بس اتشهرت المقاطع بتاعتهم، وكانوا بيصوروا من غزة، وبعتقد إن دوري كفنانة غير إني أستخدم السوشيال ميديا، إني أستخدم صوتي وأقدر أعبر عن جزء بسيط من الغضب اللي جوايا وأديهم لو قدر بسيط من الأمل إن إحنا موجودين.
كما تطرقت ديانا كرزون للتعليق على الفنانين والمشاهير الذين التزموا موقف الصمت تجاه قضية فلطسين، قائلةً: معنديش تعليق على الفنانين اللي التزموا الصمت، يعطيكم العافية، وفي الوقت ده كل واحد عارف هو بيعمل إيه، ومفيش أي مبرر ليهم ولفعلهم، وإنهم يطلعوا يقولوا كلمة حق.
ديانا كرزون: مينفعش نقول فلسطين طول عمرها كدة
وأضافت ديانا كرزون: مينفعش نقول ما هي فلسطين طول عمرها كدة وطول عمر الأم بتفقد بالـ 3 و4 أطفال، وساعات كان ييجي ضرب على غزة يومين تلاتة وننسى ونرجع نعيش حياتنا، لكن اللي بيحصل دلوقتي مش مسموح بأي دين بالعالم.
وعن أغنية الشعب البطل، التي طرحتها ديانا كرزون منذ أيام تضامنًا مع شعب فلسطين، قالت: أغنية الشعب البطل طلعتها لما كنت قاعدة وبشوف الأخبار وحسيت إني مش عارفة عايزة أقول إيه، قولت لكاتب الأغنية مش عايزة كلام حزن، إحنا عايزين نعطي الناس قوة وتكون أغنية فيها رسالة، وسجلت الأغنيبة خلال 3 أو 4 أيام.
ديانا كرزون للأمهات الفلسطينيات: ولادكم طيور بالجنة
واختتمت ديانا كرزون حديثها، موجهةً رسالة إلى الأمهات الفلسطينيات الذين فقدن أولادهن، قائلةً: مشاهد الأمهات في فلسطين صعبة وبقول للأم دي قد إيه إنتي امرأة قوية ومفيش حاجة توصف المرأة الفلسطينية، هي جبارة، ربنا يصبر قلوبهم، وبقول للأمهات ربنا معاكم ويعطيكم القوة والصبر، وولادكم طيور بالجنة.
