القرار الأصعب
• في سنة 1961 روسيا أرسلت بعثة استكشافية للقارة القطبية الجنوبية بغرض دراسة إذا كان فيها مناطق صالحة للسيطرة عليها واستخدامها في فرض النفوذ وغيرها من الأهداف الاستعمارية اللطيفة بتاعت الوقت ده وكل وقت.. البعثة كان فيها جنود وظباط وعلماء و"ليونيد روغوزوف"!.. مين "ليونيد" ده!.. ده الطبيب الوحيد اللي كان في البعثة!.. بعثة طويلة عريضة مايكونش فيها إلا طبيب واحد بس!.. إيه الفكرة يعني؟.. ده شيء ماكنش متعمد خالص لكن خبرة التجارب السابقة في البعثات السابقة خلّت المسؤولين عن البعثات مايركزوش أوي في موضوع وجود أطباء في البعثات دي!.. تكلفة زيادة على الفاضي وكده كده أكيد المكان اللي رايحينه فيه أطباء وكده كده برضه الروس بصراحة صحتهم ممتازة أساسًا.. طيب تمام.. لأ مش تمام!.. بعد 6 أسابيع من بداية مهمة البعثة "ليونيد" اللي كان عنده 27 سنة وقتها حس في يوم من الأيام بوجع رهيب في بطنه مع ارتفاع حاد في درجة حرارة جسمه!.. ولإنه دكتور قدر يشخص اللي فيه!.. التهاب حاد في الزايدة الدودية.. والحل؟.. عملية جراحية لإزالتها فورًا قبل ما تنفجر في البطن وتعمل له تسمم.. لازم يتم نقله حالًا لمستشفى عشان ده يحصل.. للأسف أقرب مستشفى كانت على مسافة 800 كيلومتر من مكان البعثة!.. يعني أكتر من المسافة بين القاهرة وأسوان اللي هي 700 كيلومتر!.. طب والعمل؟.. معظم أعضاء البعثة عرفوا إنهم قدام لحظة صعبة في الأغلب هتنتهي بوفاة "ليونيد" الشاب اللي لسه في بداية عمره.. لكن "ليونيد" نفسه كان له رأى تاني خالص.. أنا اللي هعمل العملية لنفسي!.. لحظة إيه الجنان ده؟.. بالظبط زى ما قريت كده وزى ما "ليونيد" كتب بنفسه في مذكراته وهو بيحكي القصة اللي شقلبت العالم بعد كده.. قرر يعمل العملية الجراحية لنفسه وبنفسه.. رئيس البعثة جاله عشان يخليه يغير رأيه وقال له كلام من نوعية يا ابني استسلم للقدر بقى وخلاص أو خلينا نعمل محاولة يائسة ونطلعك بعربية لأقرب مستشفى وخلاص وتاخد وقت زى ما تاخد!.. "ليونيد" رفض وصمم على قراره.. تمام انت حر.. خدر نفسه بـ بنج موضعي عشان يفضل مركز على نفسه في حالة الوعي واستعان بإتنين علماء من أعضاء البعثة عشان يمسكوله مراية يشوف تخليه شايف اللي هو بيعمله في بطنه.. المشهد أصلًا كان غريب وممكن تتخيله عشان استغرابك يزيد.. دكتور لابس أبيض في أبيض.. على وشه كمامة.. مايل بجزعه الفوقاني حتة بسيطة لقدام.. إيديه موجودة في بطنه المفتوحة وماسكة أدوات جراحية وبتشوف شغلها!.. الغريب إن العملية نجحت بشكل مبهر، وبعدها بأسبوعين كان "ليونيد" واقف وبيتعامل عادي جدًا وبيشوف مهام عمله كإن مفيش حاجة حصلت.. طب وفين الـ "إن"؟.. أكيد فيه "إن"!.. تلاقيه بقى مات بدري بدري!.. الحقيقة إن لأ.. الراجل عاش بصحة ممتازة لحد ما مات في سنة 2000 موتة طبيعية عادية وهو عنده 66 سنة.. والسبب؟.. بعد إرادة ربنا طبعًا كان شجاعة قراره اللي اتخذه وصمم عليه ونفذه.
• صعوبة بعض القرارات مش بتنفي أهميتها.. قرار البُعد عن مكان شغل كان ليك فيه ذكريات لطيفة سواء عشان تشوف فرصة تانية أفضل أو عشان بدأت تحس إن وجودك غير مرغوب فيه أكيد قرار صعب.. قرار إنك تقفل للأبد باب علاقة استمرت فترة بكل الحلو والمر اللي فيها لإنها بقت حِمل على نفسيتك أكيد قرار صعب.. قرار إنك تاخد حقك بطريقة انت مش متعود عليها لإن اللي أخدوه منك أجبروك عليها أكيد قرار صعب.. الحذر، والحسابات مطلوبين بس بدون ما يكونوا سبب في استمرار وضع مؤذي.. مش كل القرارات الصعبة غير مفيدة.
