سمسم شهاب يبكي بعزاء زوجته ويكشف وصيتها: كانت عاوزاني أبعد عن الفن وأقرب من ربنا أكتر |فيديو
كشف المطرب سمسم شهاب وصية زوجته له قبل وفاتها أمس بمرض السرطان، مشيرًا إلى أنها كانت تتمنى أن تؤدي مناسك العمرة قبل وفاتها وأن تزوج ابنتها وتفرح بها.
وقال سمسم شهاب باكيًا في لقاء خاص مع القاهرة 24 بعد انتهاء عزاء زوجته في مسجد طلعت حرب: كان نفسها تعمل عمرة وربنا سبحانه وتعالى ما أرادش وكان نفسها تفرح ببنتها، وبنتي وابني هيعملوا عمرة ليها تنفيذًا لوصيتها.
كانت عارفة ربنا
وأضاف سمسم شهاب: ولادها كانوا كل حياتها، كنت بقول لها إن شاء الله هتخفي، والحمد لله ولادي الله يبارك في عمرهم مكانوش مأثرين معاها وكذلك زوجة ابني أحمد وحفيدي كان بيبكي ويقول عاوز أروح لها وحشتني وقت وفاتها في المستشفى، هي كانت طيبة جدا ومكانتش بتزعل حد الحمد لله وكانت عارفة ربنا.
كان نفسها أبعد عن المجال
وأردف سمسم شهاب عن نصيحة زوجته له: كان نفسها إني أبعد عن المجال وكانت بتقول لي أنت تستاهل أحسن من كده وتستاهل تكون في مكان أحسن من كده وقالت لي أنا عاوزك تبعد، وربنا يكرمك إن شاء الله وتبعد وتحقق اللي أنت عاوزه وأنا كنت قريب من ربنا لكنها كانت عاوزاني أقرب أكتر من ربنا.
واستكمل سمسم شهاب مطالبًا الجمهور بالدعاء لها: ادعوا ليها بالرحمة، وأنا وولادي مش هنسكت على عمل الخير ليها وهنعمل خير وصدقة على روحها وولادي هيعتمروا لإن دي كانت وصيتها.
وأردف سمسم شهاب: الصدقة اللي هقدمها ليها لله وبيني وبين ربنا، واللي ربنا يقدرنا به هنعمله، وبدعي أروح لها في أسرع وقت لإنها وحشتني.
