محمد صبحي: مش مطلوب نحارب.. وبطلنا نتكلم عن القضية الفلسطينية
تحدث الفنان محمد صبحي عن أحداث فلسطين خلال الفترة الحالية، وعن رأيه في قرار رئيس الجمهورية عبد الفتاح السيسي بخصوص سيناء.
وقال محمد صبحي في تصريحات تليفزيونية: مكنتش مفاجأة بالنسبالي الأحداث اللي حصلت في غزة، ومستاء إن محدش قاري الواقع ولا تاريخه، عدوك بقاله 20 سنة وأكتر بيخطط لحلمه هيسيبه بسهولة!!! إحنا بنحلم بالرثاء والتعاطف.
وأضاف محمد صبحي: هل مطلوب حرب؟ لأ قطعُا، كتير اعتقدوا إن بعد حرب 73 مفيش حاجة، والجانب الفلسطيني بقاله 75 سنة بيحارب عشان أرضه المغتصبة، واللي حصل المرة دي هجمة شرسة من المقاومة الفلسطينية ومفيش حاجة بتتحرك من المنطقة العربية.. ويوم استشهاد محمد الدرة نزلت وكنت عايز أنزل وسط الناس.
محمد صبحي: إسرائيل عايزين يعلنوا الديانة الإبراهيمية.. وبطلنا نتكلم عن القضية الفلسطينية
واستكمل صبحي: النهادرة عدوك في وشك بيقولك أنا هعمل كذا، وطلعت إسرائيل قالت عايزين نعلن الديانة الإبراهيمية بلاها موسى وعيسى ومحمد ونقف عند إبراهيم، ومصر البلد الوحيد اللي شعبها رفض التطبيع، وإسرائيل بتلعب في منابع النيل وقولت ده في مشهد من مسلسل ونيس.
واختتم صبحي حديثه: كتير من خريجي الجامعة ميعرفوش تاريخنا، وبطلنا نتكلم عن القضية الفلسطينية، وفخور بقرار الرئيس السيسي والقيادة المصرية قرار مضبوط؛ لأن غيره كان ممكن يخليني أنا في موقف سيء جدا ويخليني أعرف أرد، الحمد الله الرئيس قال مفيش حد هيدخل سيناء ومش هنسيب سيناء لحد ده شيء عظيم، والفكرة دي مخطط ومبارك كان ليه رد قاطع أن سيناء مش للإيجار ولا لشيء مؤقت، إحنا بنتمسك بأرضنا.
