محسن محيي الدين عن فرقة كايروكي: كنت بسمعهم وقت الثورة.. وأغاني المهرجانات طمست فنون تلك الفترة
تحدث الفنان محسن محيي الدين، عن دوره في مسلسل ريفو بجزئيه الاثنين، بطولة أمير عيد مطرب فرقة كايروكي، وعدد من الفنانين، والذي جسد خلاله شخصية المؤلف حسن فخر الدين.
وقال محسن محيي الدين خلال تصريحات لـ القاهرة 24: الناس عجبها دوري في ريفو عشان هو فيه مشاعر الأب اللي مش حقيقي، هو كان زوج والدته بس عنده إحساس الأبوة، وإنه نفسه يساعده وبيحاول يحقق له طموحه، المشاعر دي إحنا محتاجينها بين الأولاد وأهاليهم، عشان كده الدور وصل للناس، وطبعا فكرة العلاقة بين الابن وزوج أمه، الواحد سعيد بيها أكيد.
وتابع محسن محيي الدين، معلقًا على تعاونه مع فرقة كايروكي في مسلسل ريفو، مشيرًا إلى إنه كان يعرفهم من وقت الثورة، وتابع: كنت أعرف فرقة كايروكي من قبل ما أشتغل معاهم في مسلسل ريفو، عارفهم من أيام الثورة، وكنت بسمعهم عشان كانوا بيعملوا حاجات مختلفة.
وتابع محسن محيي الدين: أيام الثورة كانوا كايروكي بيعملوا حاجات جميلة، ومن الحاجات اللي الواحد كان فرحان بيها وقت الثورة هو إن في فن جديد ظهر، لكن للأسف على طول طمسوه، وظهرت أغاني المهرجانات وأنواع تانية من الفن، فمحافظناش على الأغاني دي، ولما رجعوا يقدموا أغاني تاني مبقتش بسمعهم لأني مش بسمع حاجة خالص الحقيقة.
مسلسل ريفو
عرض الجزء الأول من مسلسل ريفو، في عام 2022، والثاني خلال هذا العام 2023، وضم العمل عددا من الفنانين، ابرزهم أمير عيد، تامر هاشم، حسن أبو الروس، صدقي صخر، وغيرهم، ومن تأليف محمد ناير، وإخراج يحيى إسماعيل.
