ويجز: المفروض نوقف كلام عن حقوق السلاحف لحد ما نتكلم عن حقوق الفلسطينيين
تحدث مطرب الراب ويجز، عن القضية الفلسطينية وما يشهده قطاع غزة خلال حربهم في الوقت الحالي مع الاحتلال الإسرائيلي، معربًا عن غضبه واستيائه بسبب عدم تحدث القائمين على منظمات حقوق الإنسان بشأن الشعب الفلسطيني.
وقال ويجز في تصريحات تلفزيونية: أول ما جيت أمريكا حسيت إننا محتاجين نصرف الفلوس دي في حاجات تانية، وبقول للشعب الأمريكي فلوسكم بتروح في اتجاه خاطئ جدًا ومحتاجين نعمل بيها حاجة تانية، مش عارف ألوم على مين ولا مين ولكن المفروض منتكلمش في بديهيات زي دي.
وتابع ويجز: إحنا محتاجين حد يوقف اللي بيحصل في غزة، اللي أنا بحاول أقوله إن الحرب دي محسومة واحنا عارفين الجانب بتاعنا كويس وإننا على الجنب الصح، ومعتقدش إن الناس هتاخد وقت عقبال ما تعرف اللي بيحصل، لأن البيت الأبيض عنده فكرة، يعني الاستخبارات الأمريكية مش عارفة اللي بيحصل في غزة؟ لأ هما مليون في المية عارفين اللي بيحصل في غزة، واللي بيحصل في غزة معمول حسابه ومعموله خطة والناس دي عارفة كويس هي بتعمل إيه.
وأضاف ويجز: الفلسطينيين مش عايزين غير أرضهم هما معندهمش غيرها، أنا عايز أعرف الناس اللي بتحامي لكيان لسة معمول أو الناس اللي جاية من برلين ونيويورك ونتنياهو مولود في نيويورك، فأتمنى إن الناس دي لو مش هتعرف تموت علشان الأرض اللي هي واقفة عليها تروح أماكنها بمنتهى البساطة.
وأردف: إحنا المفروض نوقف كلام عن حقوق السلاحف لغاية ما نشوف مين هيتكلم في حقوق الفلسطينيين، لأن كل حد بيتكلم عن حقوق كل حاجة في الكوكب إلا لما وصلنا عند النقطة دي بقت أمريكا بتحارب الإرهاب طيب فين الإرهاب؟.
