علا غانم: أنا مُحاطة بالأكاذيب وبمر بمرحلة مش حلوة.. وكل حاجة سُلبِت مني بشكل مجرم هترجعلي
كشفت الفنانة علا غانم تطورات أزمتها مع طليقها رجل الأعمال عبد العزيز حسن، مؤكدة أنها اتخذت أولى خطواتها في استعادة منزلها.
وقالت علا غانم في تصريحات إذاعية: أنا كممثلة حساسة جدًا فيما يخص السوشيال ميديا، وحريصة أن الجمهور ميشوفش مني غير كل حاجة حلوة أوي، ومبحبش أوصل للجمهور مشاكل لأن كل واحد عنده مشاكله، فبحب لما أطلع لجمهوري يكون في أخبار سعيدة.
وأضافت علا غانم: باختصار كل اللي أقدر أقوله إني بمر بمرحلة مش حلوة أبدًا، ومحاطة بـ أكاذيب وفيلم غريب وكل المشاكل اللي عندي دخلت للقضاء وواخدة خطوات في سكة سليمة، وثقتي في القضاء وفي نزاهة قضاء بلدي ثقة عمياء، ولكن الوقت طويل شوية بس الحمد لله خدت من حوالي أسبوع أولى خطواتي في استرداد بيتي.
وأضافت علا غانم: كل حاجة سُلبِت مني بشكل مجرم هترجعلي ومفيش حد مش هيتحاسب على حاجة غلط عملها، وأنا مقدرش أعرف حاجة اسمها انهيار وفشل ويأس، دي كلمات بتخليني أقول لنفسي لازم تقفي حتى لو هقع بعدين، بس كل حاجة لازم ترجعلي زي ما كانت وربنا مابيرضاش بالظلم.
علا غانم: أنا بشفق على الجيل الجديد
كما تطرقت علا غانم في حديثها إلى الحديث عن نقد الجمهور، قائلة: أنا بشفق على الجيل الجديد لأن الجحود اللي متفشي في نفسيتنا للآخر بيأثر فينا إحنا كنجوم، ما بالك اللي لسة بيحاول يقف ومحتاج دعم من النجوم والناس علشان يبقى عنده ثقة في نفسه، حتى الولد اللي عمل دور ابني في فيلم أولاد حريم كريم، علشان لسة جديد كان مُهمل شوية في اللوكيشن، مش مهتمين بيه وبيجوا عليه في حاجات أنا بقيت أعدل ده ومش عايزه حد يأذيه نفسيًا.
واستكملت: أنا بفتكر اللي حصل معانا وإحنا صغيرين فبيصعب عليا أشوف حد لسة أول مرة يقف قدام الكاميرا وكلهم ضده طيب جبتوه ليه؟ دي شحنة داخلية بنخرجها يعني؟.
