رشوان توفيق: شوفت الأنبياء في المنام.. وعمري ما عملت تنازلات أخلاقية
حل الفنان رشوان توفيق ضيفًا على أحد البرامج التليفزيونية، وكشف خلالها تفاصيل رؤيته لعدد من الأنبياء، بجانب تعليقه على أحداث فلسطين.
أبرز تصريحات رشوان توفيق
- أنا بني آدم وأتعلم من الله سبحانه وتعالى، ولقد خلقنا الإنسان في كبد، يعني مفيش حاجة بالساهل علينا أن نعمل وعلى الله قدر السبيل، أنا والله في حياتي كلها عمري ما عملت حاجة غير بـ إخلاص.
- لما بشتغل مع منتج بذاكر كويس جدًا علشان أوفر له فلوسه، وأهم شيء في حياتي كلها أن أكون مخلصًا لله سبحانه وتعالى، وأنا عمري ما عملت تنازلات أخلاقية في حياتي كلها بفضل الله.
- أنا مش عارف أوفي الرحمن فضله عليا ورحمته بيا، أنا بكلمه وبقوله يا رب أديني العزم، وأنا طمعان في فضل الرحمن.
- أنا شوفت ستنا مريم العذراء بتبسم لي في الحلم، وبعدين شوفت سيدنا رسول الله في شكل عالم أزهري على كرسي كبير، هي دي صورته في دماغي وعرفت شكله، ولله الحمد.
- شوفت سيدنا إبراهيم الخليل، كنت أنا نايم والواحد لما بينام روحه بتسرح وصحيت وروحي لسة مدخلتش في جسمي، ولاقيت راجل جالس على سجادة الصلاة الحمراء بتاعة زمان، وأنا بكلم نفسي بقول مين اللي قاعد على سجادة الصلاة بتاعتي دي؟ فدخل المكلف بالرسالة قالي إبراهيم الخليل.
- كان نفسي وأنا عندي 40 سنة أحج وربنا أكرمني وأول حجة حجيتها وأنا عندي 40 سنة، وكان معايا مراتي رحمها الله.
- في تاني حجة روحت عند الباب الأخضر بتاع مقام سيدنا رسول الله، وبعد ما روحت شوفت رؤية وشوفت سيدنا رسول الله مرة تانية، وبقيت أصرخ وأقول هو وصحيت من النوم بقول هو، وللأسف مشفتهوش تاني.
- منّ عليا الرحمن وشوفت سيدنا عيسى عليه السلام، شوفته في السماء ولابس عباية واسعة، وأنا من فرحتي بكلم هبة بنتي بقولها أنا شوفت سيدنا المسيح، وبعد كده شوفت رؤية وشوفت وشه إيه الجمال ده سبحان لله، أنا بطمع في رحمة ربنا أن يجمعني بيهم في جنات النعيم.
- أنا بحب ربنا أوي، لدرجة أني بقول يارب حبني وحبب فيا خلقك، وأجعل أسعد لحظاتي يوم خروجي من الدنيا ومترحمنيش من النظر إلى وجهك العظيم.
- الجرائم دي متكررة من إسرائيل، ولكن أنا راجل في التسعينيات بقول أن فخامة الرئيس أعطاه الله الحكمة ومنّ عليه بالإرادة القوية والإيمان والقلب الخاشع والعين الباكية.
- أنا بدعي للرئيس وأنا راجل بعيد عن كل شيء، وبيعمل ليل نهار من أجل هذه الأمة.
