نشوى مصطفى تنفعل على الهواء: مش مهم الكهربا تقطع 24 ساعة المهم إن العدو ما يذلكش
انفعلت الفنانة نشوى مصطفى، على الهواء خلال تقديمها برنامجها بنت البلد، وذلك خلال حديثها عن زيادة البنزين وقطع الكهرباء، مستنكرة من استياء البعض من قطع الكهرباء.
وقالت نشوى مصطفى خلال برنامجها عبر قناة ten: البنزين زاد لما العدو منع عنك تصدير الطاقة علشان يذلك ويكسرك ويهينك كمصري، المفروض أنت تقوله مش عاوز.. إيه يعني الكهرباء تقطع ساعتين تلاتة في اليوم، لأ اقطع 12 ساعة في اليوم بس أنا فوق العدو مش هيكسرني ومش هيذلني.
وأضافت نشوى مصطفى: الناس اللي بيقولوا الكهربا قاطعة بدال الساعة ساعتين، حتى لو قطعت 24 ساعة بس تبقى في بيتك متأمن مفيش عدو بره واقف ممكن يدخل يغتصب بنتك ومراتك ووالدتك، فالحمد لله نستحمل إحنا صحاب البلد دي ويا رب احميها واحرسها.
نشوى مصطفى تتحدث عن صعوبات واجهتها
على جانب آخر، سبق أن تحدثت الفنانة نشوى مصطفى عن الصعاب التي مرت بها في حياتها وخاصة مع بداية مشوارها الفني، مشيرة إلى أن والدها كان يعمل سائقًا بمرتب ضعيف ومع ذلك والدتها كانت صامدة ولم تشتك على الإطلاق وهو ما تعلمته منها.
وأضافت نشوى مصطفى في لقاء تلفزيوني: أنا 57 سنة مريت بظروف صعبة ماديًا واقتصاديًا، والدي سواق ومرتبه قليل، لكن والدتي عمري ماشفتها متذمرة أو بتشتكي من قلة المرتب، على قد مصروف أبويا كانت أمي ممشيه الدنيا، والدتي كمان كانت بتفصلنا اللبس، وممكن الناس تستغرب بس كان فيه أيام صعبة وكان عندي القدرة أقف في طابور كلية تجارة عين شمس علشان أخد الكتب مجانًا أو نصف الثمن، وكمان مش عيب إننا مناكلش لحمة غير مرة في الأسبوع.
