عمرو أديب عن حملة مقاطعة المنتجات: لما تنتج حاجتك ومش بتستورد 80% منها نبقى نتكلم
عبّر الإعلامي عمرو أديب عن رأيه في حملة المقاطعة للمنتجات الأجنبية الداعمة لإسرائيل، مشيرًا إلى أن تلك العلامات التجارية قائمة بأموال عمالة مصرية.
وكتب عمرو أديب عبر حسابه الرسمي على موقع X: هو ليه حضراتكم ماسكين في مقاطعة الهامبورجر.. ده مش هيخرب بيت مصريين كتير.. فيه السجاير الأمريكاني اللي بتتخانقوا عليها كل يوم.. فيه الأدوية الأمريكاني اللي بتفضلوها على البديل المحلي.. فيه كل عربيات النقل الأمريكاني اللي بتنقلوا بيها كل الخضار والفاكهة.. وفيه القمح الأوكراني اللي رئيسها أول واحد أيد الجريمة الإسرائيلية في الدنيا.. فيه كل الحاجات دي.. وفوقيها طبعًا شركة أبل الأمريكية اللي رئيسها أعلن تعاطفه مع إسرائيل ضد عدوان حماس.
وأضاف عمرو أديب: لوسمحتم اعملوا حصر كويس وقاطعوا بجد وعدوا معايا الخساير المصرية وعوضوا العمال الغلابة وشوفوا مين الكسبان من الخساير.. مصر ولا أعداء مصر.. ومحدش يقول ما هما لازم يضحوا ويترموا في الشارع.. شغل الناس وأنا تحت أمرك وطبعًا حضراتكم شايفين الوضع ولا محتاج أشرح وعشان يبقى خراب مستعجل مش لازم الأمريكاني بس فيه الأوروبي يعني لازم متنساش الإنجليزي اللي هو مسئول عن كل المنتجات المنزلية والغذائية وخد معاك الفرنساوي كله، والألمان موقفهم واضح ولو عايز التحوط أكتر الصين بصراحة معملتش حاجة وطبعًا مش هكلمك على الأتراك.
عمرو أديب: مصانع طلع عين البلد عشان تفتحها
وتابع عمرو أديب: لما نبقى تنتج حاجتك ومش بتستورد 80% منها نبقى نتكلم.. الناس يا جماعة في الشارع حرفيًا ودي كلها مصانع طلع عين البلد عشان تفتحها من خلال فلوس مصرية وعمالة مصرية كل اللي موجود هو العلامة التجارية بتاعت الخواجة اللي واقف جنب إسرائيل وهيفضل جنب إسرائيل.
